Filmi dokumentar i prodhuar në vitin 2018 “Gratë e Lirisë”, për nder të 15-vjetorit të pavarësisë së Kosovës, do të rikthehet në Kino Armata.
Për këtë ka folur protagonistja e protestave të grave të viteve të 90-ta dhe njëherësh, ish-zyrtarja e LDK-së, Melihate Termkolli. Ajo thotë se kontributi i grave ka qenë krucial.
“Ishte vullneti shumë i madh, ideali shumë i madh sepse pa vullnet të madh dhe ideal këto punë nuk ishin mbërri me u bë në ato kushte, sepse ishim në rrethana okupimi. Kontributi i grave ka qenë shumë krucial në të gjitha këto të mira. Ky film është një dëshmi, mund të bëhen me dhjetëra filma për të gjitha aktivitetet e grave, ky ndoshta është vetëm fillimi i shfaqjes së një segmenti të aktivitetit të grave për liri dhe pavarësi”, ka thënë ajo në emisionin “Herët” në Tëvë1.
Tërmkolli thotë se ka probleme të mëdha si politikë ashtu dhe shoqëri, sepse sipas saj po harrohet e kaluara, teksa shton se duhet të përjetësohen kontributet dhe sakrificat e grave.
“Ky film është bërë me dëshmu një periudhë dhe një kohë, me dëshmu një aktivitet të mirë që kanë bërë gratë. Kemi probleme të mëdha edhe si politikë dhe si shoqëri në përgjithësi, e kemi një thembër akili, harresën. Nuk është mirë me harru sepse popujt që harrojnë iu përsëritet historia. Është mirë t’i përjetësojmë ato kontribute dhe sakrifica të grave”, theksoi ajo.
Ish-deputetja e LDK-së, u shpreh se në vitet e fundit ka pasur përpjekje për devijimin e të vërtetës së protestave të grave të asaj kohe. Sipas saj, në qendër të këtyre organizimeve ka qenë forumi i gruas së LDK-së.
“Në këto vitet e fundit, ka pasur një lloj përpjekje që të devijohet e vërteta e këtyre protestave dhe krejt kontributit të grave. Ka pasur tendenca të disa OJQ-ve ta përvetësojnë këtë organizim sikur është i tyre. Natyrisht nuk kemi përjashtuar as rolin e OJQ-ve, por në qendër të krejt këtyre organizimeve ka qenë forumi i gruas së Lidhjes Demokratike të Kosovës”, përfundoi Tërmkolli. /Teve1.info/
