Njëri nga tre personat e plagosur në incidentin që ndodhi dje në lagjen “Kodra e Trimave” ndodhet në gjendje më serioze shëndetësore dhe po merr trajtim mjekësor në Qendrën Klinike Universitare të Kosovës.
Mjeku kujdestar i Klinikës së Ortopedisë në QKUK, Sami Delijaj, ka bërë të ditur se pacienti është 16-vjeçar dhe aktualisht është i shtrirë për trajtim spitalor.
Ai ka sqaruar se gjendja e tij po monitorohet vazhdimisht, ndërsa vendimi për ndërhyrje kirurgjike pritet të merret gjatë ditës së nesërme.
Sipas Delijajt, i mituri ka pësuar lëndime të rënda trupore dhe ndodhet nën mbikëqyrje të vazhdueshme mjekësore, përfshirë vëzhgime klinike, kardiologjike dhe laboratorike, megjithatë parametrat jetësorë për momentin janë të qëndrueshëm.
“Për momentin është i hospitalizuar në Klinikën e Ortopedisë, ka lëndime të rënda trupore dhe është në observim të mëtejmë klinik, kardiologjik dhe laboratorik. Parametrat për tani janë stabil. Nesër do të mblidhet konsiliumi dhe do të vendosim për trajtimin e tij kirurgjik”, ka deklaruar Delijaj.
Ngjarja ndodhi pas një përplasjeje mes dy grupeve, ku u përdor armë zjarri dhe më pas një automjet, duke lënë të lënduar tre persona. Në lidhje me rastin, autoritetet kanë arrestuar një të dyshuar.
Krejt çfarë ndodhi në “Kodrën e Trimave” në Prishtinë pas të shtënave me armë zjarri – Detaje
