Ministria e Mbrojtës së Serbisë ditë më parë në reagimin e saj publik tha se Njësi Speciale të Policisë së Kosovës të armatosur rëndë kanë hy në territorin e Serbisë për çka kanë kërkuar reagim nga faktori ndërkombëtar. Këto pretendime i ka mohuar Policia e Kosovës e cila përmes një komunikate ka thënë se diçka e tillë nuk qëndron deri sa ka shtuar se janë dezinformata. Në një përgjigje për REL-in, KFOR nuk pohoi e as mohoi nëse Policia e Kosovës hynë në territorin e Serbisë. Profesori i Kriminalistikës, Fatmir Çollaku tha se këto pretendime të Serbisë janë për ngritje të tensioneve në katër komunat veriore.
Ditë më parë Ministria e Mbrojtjes së Serbisë pretendoi se Policia e Kosovë ka shkelur në territorin e Serbisë.
Në një komunikatë për mediet kjo ministri kërkoi reagim nga misioni paqeruajtës në Kosovë, KFOR, duke pretenduar se Njësia Speciale e Policisë së Kosovës hynë të armatosur rëndë territorin e tyre.
E këto pretendime i ka quajtur dezinformata Policia e Kosovës.
“Shkrimet e tilla të referuara në njoftimin e Ministrisë së Mbrojtjes së Serbisë, janë të pavërteta dhe nuk qëndrojnë. Andaj këto shkrime dhe njoftimi i publikuar si i tillë, është një dezinformata që ka për qëllim të krijojë pasiguri te qytetarët e asaj zone dhe të njollosë punën e Policisë së Kosovës”, thuhet nga Policia e Kosovës.
Në një përgjigje për Radio Evropa e Lirë, misioni i NATO-s në Kosovë, KFOR nuk e ka pohuar e as mohuar nëse Policia e Kosovës ka hy në territorin e Serbisë.
“Ne kemi një prani të dukshme dhe fleksibile dhe jemi të pozicionuar mirë për t’u përgjigjur për çdo skenar të sigurisë, në përputhje me mandatin tonë shumëvjeçar që bazohet në Rezolutën 1244 të Këshillit të Sigurimit të Kombeve të Bashkuara të vitit 1999”, thuhet nga KFOR.
Profesori i Kriminalistikës, Fatmir Çollaku ka thënë se këto pretendime të Serbisë janë vetëm për konsum të brendshëm politik.
Sipas tij, kanë synim edhe ngritjen e tensioneve në katër komunat veriore.
“Skenar për ta destabilizuar Kosovën, për të paraqitur Kosovën para syve të ndërkombëtarëve dhe miqve ndërkombëtar si vend problematik. Policia e Kosovës nuk ka hy në territorin e Serbisë fare, këto janë dezinformata sepse lufta psikologjike ndërtohet në bazë të dezinformatave dhe fragmentalizimit të informatave të sakta që i bije në këtë rast bëhet fjalë për dezinformata, si mjet për të realizuar qëllimin e qëllimi është për ta paraqitur Kosovën si vend destabilizues njëkohësisht për ngritje të tensioneve”, tha Çollaku.
Çollaku shtoi se Serbia është duke përdorur mekanizma të ndryshme për të krijuar tensione në Kosovë përmes dezinformatave.
