Bashkësia Ndërkombëtare po vazhdon të kërkoj nga Kosova dhe Serbia shtensionimin e situatës në veri të Kosovës.
Së fundmi kryeministri i Kosovës Albin Kurti, pati një vizitë në Mbretërinë e Bashkuar, e po ashtu edhe një telefonatë me Sekretarin amerikan, Antony Blinken.
Njohësi i çështjeve politike Melazim Koci thotë se këto biseda me amerikanët dhe britanikët, paralajmërojnë de-eskalim të situatës.
Ndërsa, Astrit Istrefi nga Forumi Ballkanik, thotë se pa një kyçje direkte të presidentit amerikan Joe Biden, nuk mund të ketë deeskalim të situatës.
Tetë senatorë amerikanë i kanë dërguar një letër të përbashkët presidentit të Shteteve të Bashkuara të Amerikës, Joe Biden, përmes së cilës i kanë kërkuar që të ushtrojë gjithë presionin diplomatik, për t’i dhënë fund krizës aktuale dhe t’i detyrojë palët që të kthehen në dialog.
