Telekomi i Kosovës Sh.A. ka përmbyllur vitin 2025 me rezultate pozitive financiare dhe operacionale, duke operuar me fitim neto mbi 8.2 milionë euro dhe duke vazhduar procesin e modernizimit teknologjik në të gjitha segmentet kryesore të veprimtarisë së tij.
Në një përmbledhje zyrtare të arritjeve dhe sfidave të vitit 2025, Telekomi thekson se pas një periudhe të vështirë rimëkëmbjeje që nisi në vitin 2020, kompania ka hyrë në një fazë të re të zhvillimit të qëndrueshëm, të investimeve në teknologji bashkëkohore dhe të përmirësimit të ndjeshëm të përvojës së konsumatorëve.
Sipas të dhënave për periudhën janar–nëntor 2025, Telekomi i Kosovës ka realizuar:
Të hyra: 61,329,704 euro
Fitim neto: 8,246,275 euro
Rritje prej 15% krahasuar me vitin 2024
Gjithashtu, kompania ka ushtruar kontroll të plotë mbi shpenzimet dhe ka shlyer të gjitha obligimet e trashëguara dhe faturat rrjedhëse ndaj kreditorëve, Administratës Tatimore të Kosovës, ARKEP-it, si dhe pagesat e kredisë janë kryer brenda afateve ligjore.
Gjatë vitit 2025, Telekomi i Kosovës ka kontribuar në buxhetin e shtetit me gjithsej 17.2 milionë euro, përfshirë:
Tatime: 9,365,952.23 €
Kthim kredie dhe kamata: 4,767,667.97 €
ARKEP: 3,074,121.56 €
Modernizim i rrjetit mobil dhe zgjerim i 5G
Në fushën e shërbimeve mobile, rrjeti VALA është modernizuar me teknologjitë 4G+ dhe 5G, duke ofruar shpejtësi deri në 1 Gbps. Trafiku ditor i të dhënave ka tejkaluar 180 TB, trefish më i lartë krahasuar me vitin 2020.
Telekomi numëron rreth 830,000 klientë aktivë mobilë, prej të cilëve 120,000 përdorin shërbimet 5G.
Mbuleshmëria në vitin 2025 është si vijon:
Popullsia: 2G – 99.80%, 4G – 98.50%, 5G – 72.00%
Territori: 2G – 98.50%, 4G – 94.50%, 5G – 45.00%
Telekomi i Kosovës mban rreth 8.5% të tregut të shërbimeve fikse, me gjithsej 38,700 klientë, përfshirë 33,500 klientë me paketa internet+TV+telefon.
Rrjeti optik është zgjeruar përmes investimeve prej mbi 12 milionë euro, me 27 punishte të përfunduara dhe 41 të tjera në proces.
Gjatë vitit 2025 është implementuar platforma e re e sigurisë kibernetike me teknologji Fortinet, duke rritur ndjeshëm mbrojtjen e infrastrukturës digjitale.
Aplikacioni “Vala jonë” ka tejkaluar 200,000 përdorues aktivë, me mbi 2 milionë euro pagesa, duke shënuar rritje mbi 100% krahasuar me vitin paraprak.
Telekomi ka hapur 4 pika të reja shitjeje, ka ribranduar pikat ekzistuese dhe ka zgjeruar prezencën përmes partnerëve në rreth 3,000 lokacione.
Në kujdesin ndaj konsumatorëve, koha mesatare e pritjes në qendrën e thirrjeve është reduktuar nga 62 sekonda në 50 sekonda, ndërsa shkalla e zgjidhjes së ankesave në thirrjen e parë është rritur në 90%. Niveli i kënaqshmërisë së klientëve (NPS) ka tejkaluar pragun 50.
Gjatë vitit 2025 është përfunduar procesi i ristrukturimit për 1,653 punonjës, janë realizuar trajnime të detyrueshme dhe po vazhdon digjitalizimi i të dhënave të burimeve njerëzore.
Zyra Ligjore ka shënuar rezultate të rëndësishme, me 220 vendime gjyqësore në favor të ndërmarrjes, 950 raste përmbarimi të përfunduara dhe kursime financiare përmes ujdisë jashtëgjyqësore.
Telekomi i Kosovës Sh.A. mbetet i përkushtuar ndaj transparencës, inovacionit dhe përmirësimit të vazhdueshëm të shërbimeve, me synimin që të vazhdojë të jetë një shtyllë e rëndësishme e komunikimit digjital dhe zhvillimit ekonomik në Kosovë.
