Policia e Kosovës ka identifikuar dhe ndëshkuar një shofer i cili është filmuar duke bërë tejkalim të rrezikshëm në autostradë, duke shfrytëzuar shiritin emergjent nga ana e djathtë.
Ngjarja u bë publike përmes një video-incizimi të shpërndarë në rrjete sociale, pas së cilës Njësia për Kontroll të Autostradave ka nisur hetimet dhe ka arritur ta identifikojë shoferin në fjalë.
Sipas njoftimit zyrtar, ndaj tij është shqiptuar një gjobë prej 200 eurosh, janë vendosur 2 pikë negative dhe i është ndaluar drejtimi i automjetit për një periudhë prej 3 muajsh.
Policia ka bërë thirrje që të respektohen rregullat e trafikut, ndërsa ka theksuar se do të vazhdojë monitorimin dhe ndëshkimin e të gjithë atyre që rrezikojnë sigurinë rrugore.
