Sulmuesi Kylian Mbappe do të jetë pjesë e skuadrës së Real Madridit prej edicionit të ardhshëm.
Transferimin e tij te Reali e ka zbuluar të martën, presidenti i La Ligas, Javier Tebas. Tebas ka vlerësuar lart francezin Mbappe, ndërsa ka thënë se me transferimin e tij, Real Madridi do të bëhet edhe më i fortë.
Mbappe, ditë më parë e konfirmoi largimin nga PSG-ja dhe pritet t’i bashkohet Real Madridit si lojtar i lirë pasi kontrata me ekipin francez i skadon në verë.
“Mbappe do të jetë pjesë e Real Madridit prej edicionit të ardhshëm. Ai është njëri prej lojtarëve më të mirë në botë dhe do ta bëjë Realin edhe më të fortë, pasi aty tashmë janë Vinicius Juniori dhe Jude Bellinghami”, ka thënë Tebas.
25-vjeçari në fillim të muajit të ardhshëm do të prezantohet te Real Madridi, ekip me të cilin tashmë ka arritur marrëveshje. Ai te Reali do ta bartë fanellën me numrin 10-të dhe me skuadrën spanjolle do të firmos kontratë 5-vjeçare. Mbappe këtë edicion ka shënuar 44 gola në 47 paraqitje në të gjitha garat për Parisin.
