I fundit erdhi, pasi më herët nuk e lejuan.
Ish-presidenti Hashim Thaçi vizitoi të premten varrin e babait të tij, pesë ditë pasi ai ndërroi jetë.
Por edhe vizitën e lejuar nga Gjykata Speciale, e bëri nën përcjellje të njerëzve me arma.
E pak metra larg tij, qëndronin bashkëfshatarët e tij.
Nga larg, ata e ngushëlluan për të atin.
Vizita e tij, nuk përfundoi te varri i babait.
Nga varrezat, u nis në drejtim të shtëpisë së tij në Burojë te Skenderajt.
Brenda saj qëndroi për gati tri orë në takim me nënën dhe gruan e tij.
Mirëpo jashtë saj, qëndronin me flamuj e në rreze dielli edhe të afërm të tij.
Për vizitën e tij, njoftuan edhe nga Specialja.
“Për arsye bindëse humanitare, trupi gjykues dhe gjyqtari i procedurës paraprake kanë udhëzuar Sekretarin që të menaxhojë një vizitë në paraburgim në Kosovë për Hashim Thaçin që t’i bëjë nderimet dhe të jetë me familjen e ngushtë. I akuzuari mbetet në paraburgim dhe në paraburgim nga Dhomat e Specializuara. Kjo është vizita e katërt në paraburgim e z. Thaçi në Kosovë”, tha Michael Dozle, zëdhënësi i Dhomave të Specializuara të Kosovës.
Sipas burimeve të televizionit, Thaçi do të qëndrojë dy ditë në Kosovë.
Ish presidenti do të ketë takime edhe në selinë e Eulex-it.
