Suedia, kundërshtarja e Kosovës në kualifikimet për Kupën e Botës 2026, ka pësuar humbje turpëruese të shtunën mbrëma. Suedia u mposht 1:0 në miqësore nga Luksemburgu, që është përfaqësuese e nivelit dukshëm më të ulët.
Humbja nga Luksemburgu është pritur shumë rëndë në Suedi.
Te Suedia debutoi Besfort Zeneli, që luajti vetëm në pjesën e parë. Ai u zëvendësua së bashku me dy lojtarë të tjerë. Por ndryshimet në formacion nuk kryen punë, pasi Suedia u paraqit zbehtë edhe në pjesën e dytë.
Të martën, Suedia luan miqësore me Irlandën e Veriut. Ndeshja Kosovë–Suedi është më 8 shtator në Prishtinë.
“Është vështirë të thuhet se çka shkoi keq, por shumica e gjërave shkuan keq”, ka thënë ylli i Premier Leagues, Alexander Isak, që ishte kapiten i Suedisë në këtë ndeshje.
“Nuk e kam parë ekipin në këtë gjendje për kohë të gjatë. Qartë se është dëshpëruese që kemi luajtur në këtë mënyrë. Kundërshtari ishte më i mirë se ne dhe për këtë duhet të fajësojmë veten. Duhet të kalojmë këtë, të analizojmë se çka nuk shkoi, çka shkoi keq. Në futboll zakonisht ke mundësi për të përmirësuar gjërat dhe ne e kemi këtë mundësi të martën”, ka shtuar sulmuesi i Newcastle Unitedit. Ai ka 19 gola e pesë asistime këtë edicion në Premier League dhe vlerësohet prej sulmuesve më të mirë në botë.
Danezi Jon Dahl Tomasson është selektor i Suedisë. Ai ka vendosur t’ua jap rastin disa lojtarëve të tjerë, por mbeti i dëshpëruar me rezultatin.
“Një rezultat shumë i keq. Mendoj se Luksemburgu e ka merituar të fitojë, ishte ekip më i mirë. Nuk kam mundur ta njoh ekipin. Në dhjetë minutat e para kemi mundur të shënojmë gol. Më pas kemi luajtur shumë ngadalë. Kishte shumë gabime dhe nuk i kemi fituar topat e dytë. Kështu është vështirë të luhet futboll. Luksemburgu ka luajtur me intensitet më të mirë në përgjithësi”, ka thënë Dahl Tomasson.
“Pjesa e dytë ishte pak më e mirë, por jo sa duhet. Kur e bën një hap prapa, duhet të bësh dy hapa para. Këtë duhet ta bëjmë ne pas kësaj paraqitjeje të zbehtë”.
22-vjeçari Besfort Zeneli ishte më herët te Kosova U21. Në vjeshtë të vitit të kaluar njoftoi se ka vendosur që në nivelin senior ta përfaqësojë Suedinë e jo Kosovën. Ai është pjesë e klubit suedez Elfsborg, ndërsa luan në mesfushë. Te Suedia u ftua për herë të parë për miqësoret me Luksemburgun dhe Irlandën e Veriut.
Selektori Jon Dahl Tomasson vendosi t’ia japë rastin nga fillimi, pasi Zeneli u paraqit mirë në stërvitje. Ndeshja ndaj Luksemburgut ishte testuese për Zenelin, por rezultati në fund nuk ishte i mirë për askënd te Suedia.
“Besforti fiton rastin për të ndier aromën e futbollit ndërkombëtar. Mezi pres ta shoh, ai është paraqitur shumë mirë në stërvitje dhe do të ketë shansin për të luajtur”, kishte thënë Jon Dahl Tomasson para ndeshjes.
Në grup me Kosovën e Suedinë janë edhe Zvicra e Sllovenia. Ndeshjet e para të këtij grupi janë Sllovenia–Suedia dhe Zvicra–Kosova. Zhvillohen më 5 shtator.
