Të shtunën në sheshet e Prishtinës do të organizohet një tubim solidarizues me popullin e Gazës.
Kjo po shihet si akt simbolik solidariteti me popullin e Gazës, që po përballet me uri e një gjenocid nga shteti izraelit.
Beni Kizolli, organizator i këtij marshi dha detaje nga organizimi që pritet të mbahet me datë 9 gusht.
“Pas fjalimeve të shkurtra që do të përcjellim mesazhe për solidaritet dhe paqe njashtu kemi një videomesazh prej një studenti të Gazës që aktualisht jeton në Stamboll për studime e krejt në fund do të shfaqet një video që aktualisht është bërë simbol në të gjitha protestat, tubimet në botë që mbahet për Gazën, fjala është për vallen ‘Live Palestina’”, thotë ai.
Ai shtoi se gjatë këtij organizimi do të shfaqen vetëm sloganet zyrtare të krijuara nga ta.
“Në të njëjtën kohë si simbol janë vetëm flamujt kombëtar, shtetëror dhe flamujt të Palestinës. Në bazë të rrjedhës shpresojmë që brenda 40 minutash të përmbyllim këtë aktivitet dhe ne të rreshtohemi me të gjithë popujt tjerë të botës perëndimore që në këto ditë janë duke shfaqur aktivitete të ndryshme në emër të solidaritetit për popullin e Gazës”, shprehet Kizolli.
Kurse organizatori tjetër, Agon Dragusha ka një thirrje për gjithë qytetarët.
“Në një botë ku e vërteta zëvendësohet me propagandë, ku dhuna maskohet si vetëmbrojtje, të qëndrosh për njeriun është akt filozofik, të refuzosh heshtjen është akt moral, të solidarizohesh me Palestinën është të mbrosh vetë idenë e njerëzimit. Prandaj më 9 gusht, ora 7 në këtë vend bashkohuni me ne, jo për protestë të zakonshme por për një qëndrim të pazakontë sepse ne nuk kërkojmë shumë, vetëm një gjë që askush të mos vdes në harresë”, thotë Dragusha.
Në një festival me përmasa botërore të mbajtur në Prishtinë këtë vikend, u shfaq edhe një thirrje “Free Palestine” që simbolizon solidarizimin me këtë popull që po përballet me luftë.
