Të shtunën janë ndeshjet e xhiros së 25-të të Superligës së Kosovës në hendboll në konkurrencë të meshkujve.
Vëmendja do të jetë në palestrën “Mizahir Isma” ku përballen Rahoveci e Kastrioti. Derbi i xhiros zhvillohet nga ora 20:00.
Rahoveci ka fituar 24 ndeshjet e deritashme dhe në plejof do të startojë nga pozita e parë. Por “vreshtarët” janë të përkushtuar që ta përfundojnë stinorin e rregullt pa humbje të pësur. Kastrioti është i dyti me 38 pikë, ndërsa udhëton për të dëshmuar që ka pretendime të mëdha në plejof dhe turneun final të Kupës.
Shpresohet në ndeshje të fortë dhe me rivalitet.
Nga ora 16:00 është ndeshja mes Prishtinës e Vushtrrisë. Prishtina është e katërta me 23 pikë, ndërsa Vushtrria renditet e pesta me 16 pikë. Prej orës 19:00 është takimi Besa Famgas – Trepça. Skuadra pejane është favorite e madhe. Renditet e treta me 36 pikë, derisa Trepça është e gjashta me 12 pikë.
Në Ligën e Parë të meshkujve është java e 12-të. Të shtunën janë ndeshjet Prizreni – Ulpiana (19:00) dhe Vëllaznimi – Istogu (19:30, Junik). Të dielën prej orës 18:00 është takimi mes Drenicës e Dritës.
Në Ligën e Parë të femrave të dielën zhvillohet ndeshja mes Trepçës e Llapushës, që i takon xhiros së 10-të. Kjo ndeshje fillon në ora 14:00.
Në fundjavë fillon edhe liga e juniorëve. Të dielën në Podujevë janë ndeshjet e xhiros së parë të Grupit A: Kastrioti – Vushtrria (11:00), Llapi – Trepça (13:00), Prishtina – Ulpiana (15:00). Në Rahovec janë ndeshjet e Grupit B: Deçani – Istogu (12:00), Vëllaznimi – Rahoveci (14:00).
Ndërkohë vazhdon gara në ligën e pioniereve. Të dielën luhen ndeshje në Samadrexhë, Shtime e Klinë.
