Nisma “ Asnjë cent më shumë” ka njoftuar se të premten do të protestohet sërish kundër shtrenjtimit të energjisë elektrike.
Në njoftim bëhet e ditur se protesta do të mbahet në orën 12 në sheshin “Zahir Pajaziti”.
“Protesta e parë ishte e madhe – të premten e bëjmë edhe më të madhe. ZRRE pritet të marrë vendimin për rritjen e çmimit të energjisë elektrike. Ky është një moment shumë i rëndësishëm, zëri i qytetarëve duhet të dëgjohet. Rritja e çmimit të energjisë nuk është vetëm një faturë më shumë,ajo do të pasohet me rritje të çmimeve të ushqimeve, produkteve bazë, shërbimeve dhe kostos së jetesës në përgjithësi. Qytetarët nuk mund dhe nuk duhet të paguajnë për një krizë që nuk e kanë shkaktuar. Kërkesa jonë është e vetme dhe e qartë: PEZULLIMI I VENDIMIT PËR RRITJEN E ÇMIMIT TË ENERGJISË.
Ndryshe, të shtunën qytetarët e Kosovës kanë protestuar kundër propozimit të Zyrës së Rregullatorit për Energji (ZRrE) për ngritjen e çmimit të rrymës për 15 për qind nga muaji prill.
