Të paktën 42 persona janë vrarë në Gaza nga ushtria izraelite që nga mëngjësi i së mërkurës, përfshirë të paktën nëntë fëmijë, ka thënë Ministria e Shëndetësisë së Gazës.
Përveç vrasjeve, popullsia e Gazës gjendet në prag të një krize të madhe urie, ku raportohet se tashmë të gjitha kuzhinat dhe furrat në Gaza janë mbyllur për shkak të mungesës së furnizimeve.
Abed Nasser al-Ajrami, kryetar i Shoqatës së Pronarëve të Furrave të Bukës në Gaza, tha se Programi Botëror i Ushqimit i OKB-së ishte i vetmi sponsor i furrave të bukës në Gaza dhe siguronte “të gjitha nevojat e tyre”.
“Pasojat nga mbyllja e furrave të bukës do të jenë shumë të rënda për qytetarët, sepse ata nuk kanë alternativë për t’u drejtuar,” tha ai.
Më 2 mars, Izraeli vendosi një bllokadë të plotë në territorin palestinez dhe ndërpreu energjinë në fabrikën kryesore të shkripëzimit të ujit të Gazës – që do të thotë se edhe uji i pijshëm tani është i pakët, ka raportuar Al Jazeera.
Në ndërkohë, Operacioni ushtarak i Izraelit në Rripin e Gazës po zgjerohet për të kapur “zona të mëdha”, tha të mërkurën ministri izraelit i mbrojtjes, Israel Katz.
Katz nuk specifikoi se cilat zona të Gazës do të kapeshin në operacionin e zgjeruar, i cili tha ai përfshin “evakuimin e gjerë” të popullsisë nga zonat e luftimit. Deklarata e tij erdhi pasi Izraeli urdhëroi evakuimin e plotë të qytetit jugor të Rafahut dhe zonave përreth, ka raportuar AP.
Forumi i Familjeve të Pengëve, i cili përfaqëson shumicën e familjeve të robërve, tha se ishte “e tmerruar të zgjohesha këtë mëngjes ndaj njoftimit të Ministrit të Mbrojtjes për zgjerimin e operacioneve ushtarake në Gaza”.
“Prioriteti ynë më i lartë duhet të jetë një marrëveshje e menjëhershme për të rikthyer të gjithë pengjet në shtëpi – të gjallët për rehabilitim dhe ata të vrarë për varrim të duhur – dhe t’i japim fund kësaj lufte”, tha grupi.
Hamasi ka akuzuar Izraelin për përdorimin e urisë si “një armë të drejtpërdrejtë në këtë luftë brutale” dhe u bëri thirrje vendeve arabe dhe myslimane që “të veprojnë urgjentisht për të shpëtuar Gazën nga uria dhe shkatërrimi”.
