Po mban në duar një pankartë.
E kjo nuk është e vetmja, që këtë të premte mbushi qendrën e qytetit të Pejës.
Të tilla mesazhe, bashkë me flamuj të UÇK u mbajtën në duar nga shumë studentë.
Në këtë mënyrë, ata protestuan në mbrojtje të vlerave të luftës çlirimtare.
“Qëllimi i kësaj proteste është si masë preventive për mos me u normalizu gjendja momentale edhe fyerjet që janë ka vazhdojnë duke iu bë UÇK edhe krerëve te luftës”, deklaroi Klodian Haskaj, student në Universitetin “Haxhi Zeka”.
“Gjaku i dëshmorëve që nuk duhet harruar dhe gjithë ata që mundohen ta ndryshojnë duhet ta marin denimin e merituar”, tha studenti nga UP-ja, Adrian Mustafa.
E krahas studentëve, në këtë protestë u bashkuan edhe qytetarë të shumtë.
“S’e kom mendu që vjen dita qe na mas sa viteve dalim e protestojmë, në vend që të ecim përpara për shtet”, tha qytetari Fatmir Hasani.
Ndërsa dikush tjetër kishte vetëm një kërkesë.
“Drejtësi për udhëheqësit tanë, çlirimtarë që padrejtësisht po mbahen në paraburgim, kërkojmë që çlirimtarët sa më parë të kthehen pranë familjeve”, tha qytetari Refki Berisha.
Ndërkohë, përfaqësuesi i Parlamentit Studentor tha se kjo protestë është një moment reflektimi për gjithë shoqërinë.
“Jemi mbledhur në një moment ku ndërgjegjja e një shoqërie vihet në provë sepse ka raste në histori kur një popull duhet të vendos a duhet të hesht përballë shtrembërimit, apo duhet të ngritet në mbrojtje të së vërtetës”, tha përfaqësuesi i Parlamentit Studentor, Ardit Bobi.
Disa fjalë i pati edhe rektori i Universitetit të Pejës Armand Krasniqi.
“Ajo që po ndodh sot këtu nuk është një reagim i zakonshëm public, është një moment që kërkon një qasje të balancuar dhe të matur një qasje që kërkon lirinë e shprehjes, por njëkohësisht e vendos atë liri përballë përgjegjësisë që ajo bart”, deklaroi rektori i Universitetit të Pejës, Armand Krasniqi.
Në këtë protestë morën pjesë një numër i konsiderueshëm qytetarësh.
