Tash e dy ditë një pjesë e lagjes “ Teneqja” në Stagovë të Kaçanikut është e bllokuar.
Shiritat janë vendosur në këtë fshat duke ndaluar qarkullimin dhe punimet.
Kjo meqë aty kanoset një rrezik.
Për shkak të situatës së ndjeshme në terren përveç Policisë së Kosovës kanë dalë edhe njësitet e Forcës së Sigurisë së Kosovës dhe KFOR-it.
“Sipas KFOR-it, ekziston rreziku që mjeti të shpërthejë pas 72 orësh dhe kanë rekomanduar sigurimin e mjetit deri më 30.04.2025, pas kalimit të afatit të rrezikut, për të ndërmarrë më pas veprimet e nevojshme”, thuhet nga Policia e Kosovës.
Meqë rasti është në duart e këtyre institucioneve banorët e fshatit thonë se ndihen të lehtësuar.
Kryetari i fshatit Kemajl Jaha, tregoj që janë duke zbatuar rekomandimet që i kanë marrë prej autoriteteve.
“Kam biseduar me Policë dhe me të Komunë 72 orë kanë thanë që nuk guxojnë me u afrua qytetarët aty pari se është e rrethakuar. Nuk ndihemi të rrezikuar se është larg, shumë larg është, por tash ne po i besojmë KFOR-it dhe Policëve ata kanë thanë që mos u gajloni për këtë punë edhe ne nuk ndjehemi të rrezikuar. Nesër në mëngjes disa shtëpi kanë me i largu banorët prej shtëpive edhe me eksplodu deri nesër nuk guxojmë me shku aty pari”, ka thënë ai.
Policia i ka marrë gjitha masat e nevojshme për shpërthimin e mjetit që dyshohet se ka mbetur që nga lufta e dytë botërore.
Eksplodimi i kontrolluar do të realizohet nga ora 09:00 deri në orën 13:00.
Nga Polica e Kosovës njoftuan edhe për masat që duhet të respektohen gjatë së mërkurës.
Brena zonës së rrezikuar që është vlerësuar me një rreze prej 1000 metrash nga vendi ku ndodhet mjeti shpërthyes, ndalohet rreptësisht qëndrimi i njerëzve.
Ndërsa rekomandohet largimi në vend të sigurt i kafshëve dhe makinerive.
Ndërkohe edhe banoreve të lagjes “ Teneqja” dhe të zonës së kodrës në fshatin Stagovë ju kërkohet që të mbajnë dritaret e shtëpive hapur dhe ti larojnë veturat në vende të sigurta.
