Ministri i Jashtëm i Gjermanisë, Johann Wadephul, do të vizitojë Kosovën të martën pasdite, më 18 nëntor 2025, në kuadër të turneut të tij diplomatik në të gjashtë vendet e Ballkanit Perëndimor.
Vizita e tij ka për qëllim theksimin e mbështetjes së Gjermanisë për procesin e integrimit evropian të rajonit dhe nxitjen e reformave të nevojshme për avancimin drejt Bashkimit Evropian.
Për Tëvë1, nga Ambasada gjermane në Kosovë kanë bërë të ditur se gjatë qëndrimit në Prishtinë, ministri Wadephul do të zhvillojë takime zyrtare me presidenten e Kosovës, Vjosa Osmani, si dhe me kryeministrin në detyrë, Albin Kurti.
Pjesë e vizitës së tij në Kosovë do të jetë edhe takimi me ushtarë gjermanë të KFOR-it, ku pritet të diskutohet roli i misionit në garantimin e paqes dhe sigurisë në vend.
Kosova është një nga ndalesat qendrore të turit diplomatik të ministrit Wadephul në rajon, i cili synon t’i japë shtysë të re angazhimit të vendeve të Ballkanit Perëndimor në rrugën e tyre drejt integrimit evropian.
“Ju njoftojmë se Ministri ynë i Jashtëm, Johann Wadephul, do të vizitojë të gjashtë vendet e Ballkanit Perëndimor javën e ardhshme. Udhëtimi i tij do të fillojë në Bosnjë dhe Hercegovinë të dielën dhe do të vazhdojë përmes Malit të Zi, Shqipërisë, Serbisë për në Kosovë të martën pasdite (18.11.25) përpara se të përfundojë në Maqedoninë e Veriut të mërkurën. Në Kosovë ai do të takohet me Presidenten Vjosa Osmani dhe Kryeministrin në detyrë Albin Kurti, si dhe me ushtarë gjermanë të KFOR-it”, thuhet nga Ambasada. /teve1.info/
