Mungesa e infrastukturës dhe stadiumeve që përmbushin kriteret e UEFA’s për ndeshje evropiane është padyshim një nga problemet kryesore në futbollin kosovar.
Sivjet, ndryshe nga vitet tjera, katër skuadra kosovare do të marrin pjesë në garat evropiane, një në Champions League dhe tri në Conference League.
Megjithatë, katër skuadrat kosovare ndeshjet si vendas do t’i luajnë në stadiumin “Fadil Vokrri” në kryeqytet, kjo pasi asnjë stadium tjetër nuk i përmbush kërkesat për ndeshje të nivelit evropian.
Llapi, Gjilani, Drita e Ballkani të gjitha këto skuadra do luajnë në Prishtinë ballafaqimet e tyre në Evropë.
E mira e kësaj është që UEFA ka bërë zgjidhje për orarin e ndeshjeve, por stadiumi në kryeqytet do të mbingarkohet – pasi aty do luhen dy ndeshje për tri ditë, kurse katër në total brenda 9 ditëve.
Menaxheri i klubit tek SC Gjilani, Drilon Sylejmani, ka thënë se kjo është një ngarkesë, por që nuk do të jetë një risi pasi që ka ndodhur dhe në ciklet eleminatore të kombëtareve të Kosovës që të zhvillohen shumë ndeshje brenda pak ditëve.
Po ashtu, edhe nga kampi i Ballkanit janë shprehur të shqetësuar për këtë fakt, sepse ata pohojnë se kjo mund të jetë një barrë e madhe për fushën dhe mund të dëmtohet.
Skuadra e Ballkanit bën gara në Ligën e kampionëve, pasi u shpall kampion i Superligës, ndërsa Llapi si fitues i kupës dhe Drita e Gjilani në vendin e dytë dhe të tretë, luajnë në Conferencë Ligë.
