Shenjat informuese janë vendosur.
Bashkë me to edhe disa pengesa tjera.
Kjo pasi që nga e enjtja do të hapet një korsi në rrugën “Xhorxh Bush” në Prishtinë duke lejuar kalimin e veturave deri të hyrja e parkingut nëntokësor.
Kurse menaxhmenti i parkingut nëntokësor pret që hapja e kësaj rruge do të rrisë numrin e klientëve deri në 50%.
“Hapja e hyrje daljes nga katedralja e lehtëson qarkullimin e veturave të cilat dëshirojnë të vizitojnë parkingun nëntokësor sepse edhe vet parkingu është i projektuar për ta liruar kryeqytetin nga veturat dhe sa ma lehtë veturat ta gjejnë parkingun nëntokësor aq ma pak vetura do të enden nëpër rrugët e kryeqytetit. Në presim që minimalisht 50% të ngritët numri i vizitorëve në parkingun nëntokësor dhe kjo normalisht do të duket edhe në qytet ku do të shohim më pak vetura”, thotë Korab Fazli, menaxher në parkingun nëntokësor.
Edhe Drejtori i Shërbimeve Publike, Bekim Brestovci tha që qarkullimi do të behet vetëm deri tek hyrja e parkingut 038.
Por nga opozita, hapjen e kësaj rruge po e shohin në dëm të qytetarëve.
“Përveç aspektit estetik dhe praktik që do t’i bëjë dëm rrugës natyrisht që do të paraqesë vështirësi edhe për automjete që nuk janë të qytetit dhe vinë në atë rrugë ndërkohë që tek semaforët nuk ka një shenjë që tregon që ndalohet hyrja ndërkohë pas 50 metrave pikërisht tek hyrja e parkingut është shenja ku tregon që këtu përfundon rruga. Aty do të krijohen kolona shtesë për ata të cilët do të hynë në atë rrugë pa e ditur se ku po hynë pa e ditur se është rrugë pa dalje”, thotë Gëzim Seveçla nga Lëvizja Vetëvendosje.
Edhe pse sinjalizimi në rrugë është bërë deri te hyrja kryesore e parkingut, shumë shpejt do të vendosen edhe tabela tjera informuese ku tregojnë që afër rruge ka qytetarë që kalojnë dhe fëmijë që luajnë në sheshin “Xhorxh Bush”.
