Më 6 shkurt të këtij viti, në kryeqytet u bë një tentim vrasje, në lagjen “Enver Maloku”.
Dy burrat që dyshohet se e kryen aktin, Orges dhe Olis Rusinovci, për një kohë ishin në kërkim të Policisë.
Dy vëllezërit nuk ishin të arritshëm për organet e sigurisë.
Policia e Kosovës, siç duket nuk arriti asnjëherë në gjurmët e tyre.
Kjo pasi, televizioni merr vesh se të njëjtit, disa javë pas krimit, ishin vetëdorëzuar në polici.
Orges dhe Olis Rusinovci, po ashtu dorëzuan edhe armën me të cilën dyshohet se është kryer vepra penale.
Televizioni ka tentuar të marrë qëndrim nga Policia lidhur me veprimet që janë ndërmarrë ndaj dy të dyshuarve, por nuk ka pasur përgjigje.
Mirëpo, qëndrimin në institucionet e sigurisë, ata nuk e patën gjatë.
Të njëjtit, siç merr vesh televizioni, me vendim të prokurorit janë liruar.
Lidhur me këtë veprim, Prokuroria Themelore në Prishtinë, nuk dha shumë detaje, me arsyetimin e mund të dëmtohet integriteti i hetimeve.
“Prokurori i shtetit është në ndërmarrjen e të gjitha masave dhe veprimeve hetimore mbi këtë çështje. Për më shumë informacione nuk mund të ofrojmë pasi që mund të dëmtohet integriteti i hetimeve”, thuhe nga prokuroria.
Rrjedhimisht, nuk është bërë e ditur nëse prokuroria është afër aktakuzës për këtë rast kriminal.
