Në Gjykatën Themelore në Prishtinë ka filluar shqyrtimi gjyqësor në rastin “Banjska”.
Të pranishëm në sallë janë tre te arrestuarit Blagojr Spasojeviq, Vladimir Toliq dhe Dushan Maksimoviq.
Edhe në shqyrtimin gjyqësor, të akuzuarit për rastin “Banjska” janë deklaruar të pafajshëm.
“Nuk jam fajtor për veprën penale dhe këtë aktakuzë”, ka deklaruar Blagoje Spasojeviq.
I pafajshëm për akuzat ndaj tij është deklaruar edhe Vladimir Toliq.
“Nuk jam fajtor për veprat penale që më vihen në barrë”, ka deklaruar ai.
Njëjtë si dy të akuzuarit tjerë është deklaruar edhe Dushan Maksimoviq
“Nuk jam fajtor për veprën penale në këtë aktakuzë”, ka deklaruar Maksimoviq.
Ndryshe, edhe në shqyrtimin fillestar të mbajtur më 9 tetor 2024, tre të pandehurit janë deklaruar të pafajshëm.
Të akuzuarit – V.T. (Tolliq), B.S. (Spasojeviq) dhe D.M. (Maksimoviq) – u arrestuan pas sulmit të armatosur më 24 shtator 2023 në Banjskë.
Ata janë të vetmit nga gjithsej 45 të akuzuarit për këtë rast që ndodhen në paraburgim dhe në dispozicion të drejtësisë.
Prokuroria Speciale e Kosovës ka ngritur aktakuzë ndaj Milan Radoiçiqit dhe 44 personave të tjerë për terrorizëm dhe vepra të rënda penale, të cilët dyshohen se përmes dhunës dhe armatimit të rëndë, synuan shkëputjen e pjesës veriore të territorit të Kosovës dhe bashkimin e saj me Serbinë.
Gjatë sulmit, mbeti i vrarë polici Afrim Bunjaku dhe u rrezikua jeta e zyrtarëve të tjerë policorë dhe e popullatës civile.
Sot vazhdon seanca ndaj të akuzuarve për sulmin terrorist në Banjskë
