Në secilën pjesë, tavanet janë të hapura.
Ndërsa në disa të tjera, mungon edhe ndriçimi.
Në këtë gjendje ruhen barnat farmaceutike në depon qendrore të Ministrisë së Shëndetësisë.
Madje sipas kryetarit të Komisionit për Shëndetësi, Bekim Haxhiut, nga reshjet e fundit të shiut, në këtë depo pati edhe vërshime.
“Vërshimet e fundit të reshjeve të shiut që ndodhën javën e kaluar kanë dëmtuar barnat në depon qendrore farmaceutike dhe kjo për mua është shqetësuese sepse si është e mundur që barnat të ruhen në një depo ku depërton uji, sepse kushtet dhe kriteret për depo janë të përcaktuara me udhëzim administrativ dhe me ligj ato duhet të ruhen në vend të sigurtë ku nuk depërton lagështia”, tha kryetari Haxhiu.
Por këtë e ka mohuar Ministria e Shëndetësisë.
“Ju njoftojmë se barnat të cilat gjinden në Depon Qendrore të MSh-së, nuk ka pasur ndonjë dëm, janë të sigurta dhe menaxhohen në mënyrën më të mirë”, thuhet nga Ministria e Shëndetësisë.
Nga kjo ministri bëjnë të ditur se është hartuar edhe Plani i Veprimit për deponë e re.
Sipas këtij institucioni, MSh ka përcaktuar hapësirën për depon e barnave dhe në të njëjtën kohë, e njëjta depo është marrë me qira deri në shpronësimin përfundimtar.
E për kalimin e tyre në depo të re po e mirëpresin Oda e Farmacistëve të Kosovës.
“Po besoj që ata duke i respektuar kushtet apo procedurat e distribuimit të barnave, do t’i bartin siç e kërkon ligji dhe udhëzimi administrativ dhe përfundimisht do të ketë një vend në të cilin do të ruhen mirë dhe do të përdoren efektshëm nga qytetarët”, tha Kadri Bytyçi nga Oda e Farmacistëve të Kosovës.
Nga Ministria e Shëndetësisë, të enjten gjithashtu është kontraktuar një kompani për projektimin e depos së re, ku nga Zyrtari Kryesor Administrativ është nxjerrë edhe vendimi i grupit punues, i cili do të përcaktojë termat e referencës për asgjësimin e barnave pa afat që gjenden në depo të kësaj ministrie.
