Në Kampin Bondsteel është mbajtur ceremonia e ndërrimit të komandës në kuadër të misionit të KFOR-it.
KFOR njofton se sot, komandanti i Komandës Rajonale Lindje (RC-E) të misionit të udhëhequr nga NATO, kolonel Peter Helzer, ka kryesuar ceremoninë e ndërrimit të komandës për Task Forcën Ajrore në kampin Bondsteel.
“Gjatë këtij eventi, komandanti në largim, nënkolonel Bryan Reid, e ka transferuar zyrtarisht autoritetin te pasardhësi i tij, nënkolonel Brian Snook,” thuhet në njoftimin e KFOR.
Bëhet e ditur se kolonel Helzer ka vlerësuar lart punën e komandantit në largim. “Kolonel Helzer ka lavdëruar Nënkolonelin Reid për udhëheqjen dhe përkushtimin e tij të jashtëzakonshëm, dhe ka shprehur urimet më të mira për nënkolonelin Snook teksa ai merr përsipër përgjegjësitë e reja,” thuhet tutje.
KFOR rithekson se “vazhdon të zbatojë mandatin e tij – të bazuar në Rezolutën e Këshillit të Sigurimit të OKB-së – për të kontribuar në një ambient të sigurt dhe të qëndrueshëm për të gjithë njerëzit dhe komunitetet që jetojnë në Kosovë dhe për lirinë e lëvizjes, në çdo kohë dhe në mënyrë të paanshme.”
