Puna po vazhdon, e ambienti i shkatërruar nga zjarri vazhdon të jetë i njëjtë. Janë bërë tri javë që kur objekti i Institutit të Mjekësisë Ligjore u kaplua nga zjarri, ku si pasojë dy zyre mbeten të dëmtuara.
Ndonëse vlerësohet si një institucion i rëndësishëm, sanimi i dëmit ende nuk ka filluar. E për këtë ushtruesi i detyrës së drejtorit në këtë institut, Ditor Haliti, thotë se rinovimet nuk kanë filluar ende meqë janë në procedura të vlerësimit të dëmit dhe sigurisë së objektit.
“Jo sanimi i dëmit ende nuk ka filluar sepse jemi në procedura të vlerësimit të dëmit dhe procedurat e vlerësimit të sigurisë se objektit. Këto procedura kanë për qëllim që të shohin dëmet materiale që janë shkaktuar nga zjarri si dhe të vlerësohet i gjithë sistemi i sigurisë së objektit të IML-së që ngjarje të tilla të mos përsëriten në të ardhmen. Vlerësohet se elektriciteti në IML pra problemet me rrymë është vërtëtuar se kanë qenë shkak i zjarrit qe dy herë… Janë dy zyre që janë dëmtu në fakt janë dëmtu edhe hapësira tjera më shumë prej tymit se prej zjarrit”, thotë Haliti.
E që ky objekt të renovohet gjatë këtij viti nuk po shpreson ish-sekretari në Ministrinë e Drejtësisë, Ardian Bajraktari njëherit edhe avokat.
“Vlerësoj që ky objekt ka nevoj të i bëhet një rinovim i tërësishëm me fokus qështjen e energjisë elektrike që të parandalohen situata të tilla… mos inicimi i procedurës për rinovimin e objektit mendoj që është bërë meqë jemi në fund të vitit fiscal dhe jemi në fazën kur bëhen mbylljet buxhetore përkatëse dhe meqë është fatkeqësi mendoj se nuk ka pas mjete të ndara dhe shpresoj që kjo gjë të merret me seriozitet dhe prioritet”, bën të ditur Bajraktari.
Ndërkaq përshpejtim të procedurave po kërkojnë edhe njohës të fushës së sigurisë.
“Ky objekt duhet të sigurohet duhet të merren të gjitha masat e sigurisë e sidomos kur në këtë objekt janë të vendosura prova dhe dëshmi të cilat duhet të jenë në gjendje për shërbim për institucionet që i përdorin ato apo edhe për të i arkivuar të cilat duhet të jenë në dispozicion… nuk mendoj se ka një qasje serioze deri më tani për rinovimin apo ristaurimin e këtij objekti”, deklaroi Bedri Elezi, njohës i sigurisë.
Televizioni ka tentuar të marrë një përgjigjje edhe nga Prokuroria lidhur me hetimet mbi rastin, mirëpo të njëjtit nuk kanë qenë të qasshëm deri në publikimin e kësaj kronike.
