Presidenti Donald Trump rriti zyrtarisht tarifat për të gjitha importet e çelikut dhe aluminit në 25% të mërkurën, duke premtuar se taksat do të ndihmonin në krijimin e vendeve të punës në fabrikat amerikane.
Trump hoqi të gjitha përjashtimet nga tarifat e tij të vitit 2018 për metalet, përveçse shtoi rritje të tarifave për aluminin nga 10%.
Presidenti amerikan ka tarifa të veçanta për Kanadanë, Meksikën dhe Kinën, me plane për të taksuar gjithashtu importet nga Bashkimi Evropian, Brazili dhe Koreja e Jugut duke vendosur tarifa “reciproke” duke filluar nga 2 prilli.
BE njoftoi kundërmasat e veta të mërkurën. Presidentja e Komisionit Evropian Ursula von der Leyen tha se ndërsa Shtetet e Bashkuara “po aplikonin tarifa me vlerë 28 miliardë dollarë, ne po përgjigjemi me kundërmasa me vlerë 26 miliardë euro”, ose rreth 28 miliardë dollarë, raporton AP.
Këto masa, të cilat mbulojnë jo vetëm produktet e çelikut dhe aluminit, por edhe tekstilet, pajisjet shtëpiake dhe mallrat bujqësore, do të hyjnë në fuqi më 1 prill.
Trump kërcënoi të martën se do të vendoste tarifa prej 50% për çelikun dhe aluminin nga Kanadaja, por ai zgjodhi të qëndrojë me normën 25% pasi provinca e Ontarios pezulloi planet për të vendosur një shtesë për energjinë elektrike të shitur në Michigan, Minesota dhe Nju Jork.
Eksportuesit kryesorë të çelikut në SHBA janë Kanadaja, Meksika, Brazili, Koreja e Jugut dhe Japonia, me eksportet nga Tajvani dhe Vietnami që po rriten me një ritëm të shpejtë, sipas Administratës Ndërkombëtare të Tregtisë.
