Me të kryer orarin e rregullt të punës, ushtruesi i detyrës së Ministrisë Financave, Hekuran Murati kishte nisur shfletimin e mediave në rrjetet sociale.
Por lajmi për kërkesën e presidentes Vjosa Osmani, drejtuar qeverisë për pezullimin e tarifës ndaj produkteve me origjinë nga SHBA nuk i pëlqeu këtij të fundit.
Prandaj Murati përmes llogarisë së tij në rrjetin social facebook reagoj kundrejt kësaj kërkesë të presidentes së vendit.
Madje, këtë kërkesë të shefes së shtetit, Murati e quajti edhe jo serioze.
“Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”.
E nuk vonoi shumë erdhi edhe kundërpërgjigja nga Presidenca.
Këshilltari i Presidentes, Bekim Kupina e quajti reagimin e Muratit si të turpshëm e skandaloz.
“Hekuran Murati është njeriu i fundit në këtë shtet që mund të na flasë për seriozitet. Një njeri që ende nuk e ka kuptuar që udhëheqja e shtetit është punë 24/7, e jo që përfundon në orën 16:00, një njeri që ende nuk e kupton që sipas Kushtetutës dhe komentarit të Kushtetutës, objektivat e politikës së jashtme i përcakton institucioni i Presidencës, që nuk e kupton që këto gjëra nuk janë thjesht veprime ekonomike, por veprime strategjike në raport me aleatin tonë strategjik e ekzistencial”.
E pas kësaj përplasje, eksperti i ekonomisë tregon se në fushëveprimin e kujt janë marrëveshjet ndërkombëtare.
“Kështu që i takon Ministrisë së financave që të ngrit nevojën për një marrëveshje ndërkombëtare me pjesën e Amerikës dhe sigurisë zyra e kryeministrit dhe ta ngris një marrëveshje. Në këtë rast presidentja nuk ka përveë të ruaj marrëdhëniet dhe vizitat bilaterale por marrëveshjet nderkombetare i takonë zyres se kryeministrit gjegjësisht ministrit të financave”, thotë Adem Qorolli – ekspert i ekonomisë.
Megjithatë, Osmani mori mbështetje për këtë kërkesë nga Kongresistët republikanë.
Carlos Gimenez lavdëroi kërkesën e presidentes Vjosa Osmani drejtuar qeverisë për heqjen e tarifës ndaj importeve të produkteve të SHBA-së, duke theksuar se shembullin e Kosovës duhet ta ndjekë edhe Evropa.
“Faleminderit, zonja presidente! Kjo po pranohet mirë në Shtetet e Bashkuara dhe aleatët tanë tjerë në Evropë duhet të ndjekin shembullin tuaj”, shkroi në X, Gimenez.
Edhe kongresisti tjetër nga radhët e republikanëve, Keith Self, mirëpriti kërkesën e presidentes Osmani, duke thënë se ky është mësim i jashtëzakonshëm.
“Ky është një mësim i jashtëzakonshëm në lidership për partnerët tanë evropianë që duhet ta marrin parasysh”, postoi në X, Keith Self.
Edhe Oda Amerikane ka mirëpritur deklaratën e presidentes së Kosovës, Vjosa Osmani-Sadriu.
