Kanë mbetur edhe pak ditë kur mijëra kompani në Kosovë do të dalin në treg të hapur.
Nga 1 qershori kompanitë që kanë më shumë se 50 punëtorë pritet që ta paguajnë më shtrenjtë energjinë elektrike.
Kjo pasi me vendim të ZRRE, bizneset duhet ta zgjedhin vetë furnizuesin e tyre me energji elektrike.
E që të mos dalin në treg të lirë, shumë biznese kanë aplikuar në KESCO.
“Atëherë aktualisht numri i bizneseve të cilët kanë aplikuar për ta vazhduar me tarifat e rregulluar është shumë I madh dhe është rritur në këtë dy javorshin të fundit pas shtyrjes afatit për aplikim. Siç e dini sot është dita e fundit kur bizneset kanë pasur mundësi të aplikojnë dhe procesi po shkon shumë mirë. Rrjedhimisht se çka do të ndodhë në hapat tutje ne nuk e dimë meqenëse në javën e ardhshme që I gjithë sektori energjetik të mblidhet dhe varësisht nga vendimet që merren nga rregullatori ne do të vazhdojmë të i zbatojmë”, thotë Margarita Rushiti nga KESCO.
Kosova, sipas Dhomës së Tregtisë nuk është gati për një hap të tillë.
“Aktualisht ne kemi nga 19 kompani që janë të licencuar nga ZRRE kemi vetëm një që mund të ofroj energji elektrike.. Ofertë aktualisht bizneseve duke dërgua vetëm KESCO, dmth po shndërrojmë një biznes që ka qenë duke furnizua, do të vazhdojë, çmimet që po ofron është 250% më shtrenjtë deri me tani që kanë pahu bizneset tona”, tha Kushtrim Ahmeti.
Edhe sipas Avokatit të popullit, pasojat e liberalizimit të tregut për bizneset, do t’i bartin qytetarët.
“Moskrijimi i kushteve të favorshme për bizneset, vendosja para një situate të tillë ku detyrohen me pranu furnizimin me energji, duke krijuar monopol të furnizimit në mungesë të ofertave të tjera, në mënyrë të drejtpërdrejt ndikon në rritjen e kostos së jetesës dhe kjo pastaj është pasojë që e bartin vet qytetaret. Pra, në këtë rast nëse nuk duam ta luajmë rolin e mbrojtësit të bizneseve, duhet ta luajme rolin e mbrojtës së qytetarit”, thotë Avokati i popullit.
Ditë më parë, ministrja në detyrë e Ekonomisë, Artane Rizvanolli ka bërë të ditur se janë duke finalizuar një skemë të re mbështetëse për prodhuesit vendorë.
