Eksperti i Politikave të Sigurisë dhe Gjeopolitikës, Ilir Kulla ka dhënë detaje mbi profilin e ish-shefit të Shërbimit të Inteligjencës Turke, Hakan Fidan me të cilin kryeministri i Kosovës, Albin Kurti u takua në cilësinë e ministrit të Punëve të Jashtme të Turqisë.
Kulla ka thënë se Hakan, ka qenë promotor i këtij takimi, duke qenë se ka një vëmendje në raport me Ballkanin.
Për Kullën, Hakan e bën më së miri detyrën e ministrit të jashtëm, pasi që ai i ka dy armë, botën e inteligjencës dhe diplomacisë.
“Duke qenë që e njoh edhe Hakanin dhe e di se ç’vëmendje ka në raport me Ballkanin, mendoj që ai ka qenë një nga promotorët kryesor të kësaj vizite, duke pasur parasysh që sapo u emëruar Ministër i Jashtëm vjet, një nga vizitat e para që ka bërë ka qenë pikërisht Kosova. Është një njeri që ka dy elemente, që e bën më mirë se tjerët diplomacinë, pasi i ka dy armët edhe botën e inteligjencës dhe ka diplomaci. Ka eksperiencën e lidershipin, pasionin e moshën për ta bërë mirë këtë gjë”, është shprehur ai në emisionin “MATRIX” në TËVË 1.
Ndërsa, Kullla vlerëson se një nga sukseset më të mëdha të Hakanit, teksa ka qenë drejtor i shërbimit sekret turk është ekstradimi i grupit të Gylenistëve nga Kosova në Turqi.
“Hakan e njeh Kosovën që nga koha kur ka qenë drejtor i TIKA-s ( Agjencisë Turke për Zhvillim) në qeverinë e parë Erdogan. Hakan ka qenë drejtor i famshëm i shërbimeve sekrete turke, me shumë suksese por edhe me shumë pikëpyetje. Një nga sukseset e mëdha të Hakan ka qenë ekstradimi i atij grupit të Gylenistëve nga Kosova drejt Turqisë, në Kosovën kur Kosova kishte kryeministër, zotin Haradinaj dhe president zotin Thaçi dhe zoti Kurti ishte në opozitë”, ka shtuar ai. /teve1.info/
