Emisari i Bashkimit Evropian, Miroslav Lajcak është takuar me presidentin e Serbisë, Aleksander Vuciq. Pas takimit, Lajcak ka thënë së Vuciq ngriti shqetësime të forta për gjendjen e serbëve në Kosovë derisa për të njëjtën çështje foli edhe Vuciqi në një konferencë për media. Kurti gjatë asaj kohe ishte në veri të Kosovës dhe nuk i komentoi deklaratat e presidentit të Serbisë.
Të martën, u ulën përballë njëri – tjetrit.
Emisari i Bashkimit Evropian për dialogun Kosovë – Serbi, Miroslav Lajçak në Beograd u prit në takim nga presidenti i Serbisë, Aleksandër Vuciq.
Sipas deklaratës së Lajcak në rrjetin social X, disponimi duket se nuk ishte shumë i mirë.
“Në takimin tim sot me presidentin e Serbisë, Aleksander Vuciq, në përgatitje të takimit të radhës të kryenegociatorëve, ai ngriti shqetësime të forta për gjendjen e serbëve të Kosovës. Theksova se duhet të diskutojmë dhe të gjejmë zgjidhje të dakorduara në Dialog”, thuhet në njoftim.
E ndryshe prej emisarit të BE-së, presidenti serb doli në konferencë për media.
Vuciq tha se Serbia është e gatshme për dialog mirëpo brenda 72 orëve të ardhshme do të ndërmerrë masa si reagim ndaj sic e quajti ai, gjendjen e serbëve në veri të Kosovës.
“Sulmi brutal ndaj popullatës serbe, kryesisht në veri të Kosovës dhe Metohisë, është thelbësor. Për ne dhe për të tjerët është plotësisht e qartë se Kurti dëshiron shkatërrimin dhe persekutimin e popullit serb , e me gjithë këtë vijnë vetëm fjalë dënuese nga BE-ja dhe Quinta dhe asgjë nuk shihet në veprim. Serbia është gjithmonë pro dialogut, por ne do të marrim masa serioze brenda 72-orëve”, tha Vuçiq.
E këtë deklaratë të Vuciqit nuk deshi as ta komentojë gjatë ditës kryeministri i Kosovës, Albin Kurti.
Vuçiq në Beograd është takuar edhe me ambasadorin e SHBA-së atje, Christopher Hill.
