Shefi i Grupit Parlamentar të Partisë Demokratike të Kosovës (PDK), Abelard Tahiri tha se në takimin e 14 shtatorit, mes kryeministrit të vendit, Albin Kurti dhe presidentit serb Aleksandër Vuçiq, Kosova nuk do të ketë avantazh për shkak të masave të vendosur nga ShBA-ja dhe Bashkimi Evropian.
Duke folur për takimin e 14 shtatorit, Tahiri tha se në këtë proces Serbia është në avantazh.
“Përderisa jemi të sanksionuar kemi disa masa të vendosura nga BE e ShBA nuk mund të flasim për avantazhin e Kosovës. Nuk shkon Serbia e sanksionuar, por Kosova shkon e sanksionuar, ky është një dëm që Qeveria i ka shkaktuar Kosovës”, tha Tahiri pas mbledhjes së Kryesisë së Kuvendit.
Tahiri, tha se çdo votë opozitare do të ia zgjasë jetën Qeverisë.
“Çdo votim i yni do të ja zgjasë jetën kësaj qeverie. Nuk ka as edhe një arsye të vetme që ta ndryshojmë këtë qëndrim. Ne nuk e votojmë as një iniciativë në Kuvend të kësaj Qeverie, asnjë marrëveshje ndërkombëtare asnjë ligj as rezolutë asgjë tjetër”, tha ai.
