Emisari i BE-së për dialogun Kosovë – Serbi, sot erdhi në Kosovë, ku u takua me zëvendëskryeministrin, Besnik Bislimi. Sipas Lajçak, është arritur ujdia që të ketë takim të nivelit të kryenegociatorëve, mes Bislimit dhe Petkoviqit.
Ndërtesës së Qeverisë së Kosovës, ia mësyu që në mëngjes.
Emisari i BE-së për dialogun Kosovë – Serbi, Miroslav Lajçak, u takua me zëvendëskryeministrin e Kosovës, Besnik Bislmi.
Nga ky takim u tha se u arrit pajtim për një takim mes kryenegociatorëve, Bislimi dhe Petkoviq, por nuk u bë e ditur data.
E temë e diskutimit mes Lajçak e Bislimit, ishte edhe ura e Ibrit.
“Diskutuam edhe për çështjen e urës, urës së Mitrovicës dhe hapjes së saj për transport. Qëndrimi i Bashkimit Evropian mendoj se është i njohur, por do ta përsëris; Ura duhet të hapet, por kjo hapje duhet të bëhet në bashkëpunim të ngushtë me partnerët ndërkombëtarë të Kosovës dhe ne po diskutonim detajet e këtij procesi”, ka thënë Lajçak.
Për këtë çështje, edhe Zyra e Kryeministrit, përmes një komunikate për media, tregoi qëndrimin e shprehur nga pala kosovare.
“Zëvendëskryeministri Bislimi theksoi se hapja e urës kryesore të Mitrovicës mbi Ibër është çështje e trajtuar dhe dakorduar në Bruksel, në kuadër të procesit të dialogut të ndërmjetësuar nga Bashkimi Evropian dhe se ajo duhet të hapet sipas marrëveshjes ekzistuese dhe konkluzioneve të vet raportit të Komisionit Evropian të vitit 2020, që vlerëson se punimet në urë kanë përfunduar dhe ajo duhet të hapet pa vonesa dhe pa pengesa të mëtejme.”, thuhet në komunikatë
Lajçak, theksoi se pala serbe ka tërhequr letrën nga BE-ja, e cila thoshte se shteti serb nuk do t’i zbatonte Marrëveshjen e Ohrit dhe aneksin e zbatimit.
“Letra është tërhequr. Pra, ka deklarata aty-këtu që nuk janë të dobishme. Por, marrëveshja si e tillë është e vlefshme në tërësinë e saj, dhe për më tepër, marrëveshja është bërë edhe pjesë e rrugës së Kosovës drejt BE-së dhe rrugës së Serbisë drejt BE. Kështu që unë do të thoja se vlen dy herë, ndërmjet Serbisë dhe Kosovës, dhe ndërmjet Kosovës dhe BE-së, dhe Serbisë dhe BE-së.”, deklaroi Lajçak.
Emisari Lajçak, nuk pati takime të tjera në Kosovë.
