Tahiri tha partia në pushtet është bërë arrogante duke besuar se 50 përqindëshi është i përjetshëm për të. Tahiri tha se Lëvizja Vetëvendosje po refuzon të bisedojë me secilën kategori për Ligjin për pagën minimale.
“Ky pushtet është bërë arrogant duke besuar se 50 përqindëshi është i përjetshëm për ta dhe po refuzon të bisedojë me secilën kategori, në këtë rast edhe me veteranët edhe me opozitën për një ligj kaq të rëndësishëm siç është ligji për pagën minimale duke i përjashtuar veteranët nga ky projektligj. Pushteti nuk duhet të jetë arrogant vetëm sepse i ka numrat në Kuvend, duhet të dëgjojë qytetarët, duhet të dëgjojë veteranët, Ushtria Çlirimtare e Kosovës është vlerë e shoqërisë sonë, është një vlerë e jashtëzakonshme bashkë me luftën që është bërë për vite të tëra, bashkë me përpjekjen e madhe me lëvizjen e viteve të 90-ta. Dhe të gjitha këto bashkë kanë kulmuar me lirinë dhe pavarësinë tonë dhe duhet të trajtohen kësisoj vetëm pse në këtë moment i kanë numrat në Kuvend”, tha Tahiri.
Ish-kryetari i Komunës së Vushtrrisë, Xhafer Tahiri tutje në emisionin “Ditari” në Tëvë1 deklaroi se LDK-ja ka kërkuar dialog social bashkë me veteranët, me sindikatat dhe grupet e tjera shoqërore, në mënyrë që të ketë marrëveshje që Ligji për pagën minimale të votohej pastaj nga të gjitha partitë politike në Kuvend.
“Natyrisht që Lidhja Demokratike e Kosovës nuk ka mbështetur këtë ligj në këtë formë dhe ka kërkuar të që kemi një dialog social bashkë me sindikatat bashkë me grupet e tjera shoqërore në këtë rast edhe me veteranët në mënyrë që të kemi një marrëveshje e cila pastaj do të votohej nga të gjitha partitë politike në Kuvend sepse ky ligj i përket të gjithëve dhe duhet të kemi më shumë dialog, më shumë bashkëpunim dhe të kemi pastaj një marrëveshje që të mos kemi akuza dhe kundër akuza të rënda nga dy partitë tjera në drejtim të deputetëve të Republikës së Kosovës”, tha Tahiri. /teve1.info/
