Shefi i grupit parlamentar të Aleancës për Ardhmërinë e Kosovës, Besnik Tahiri, gjatë seancës së jashtëzakonshme për çmimet e derivateve, e konsideroi qeverinë përgjegjëse për krizën si “jo serioze” dhe akuzoi viktimizim politik në vend të zgjidhjeve konkrete.
Tahiri tha se kriza me të cilën po përballet Kosova rëndon kryesisht mbi qytetarët dhe se reagimi i qeverisë nuk ka qenë adekuat.
Ai theksoi se opozita, përfshirë Lidhjen Demokratike të Kosovës, ka ngritur temën e çmimeve të naftës dhe të energjisë, duke synuar zgjidhje për barrën e rëndë që rëndon mbi familjet kosovare.
“Sot jemi në këtë seancë që është bukur me një temë të rëndësishme, të cilën e kemi ngritur ne si opozitë, ndërsa rezolutën e ka propozuar Lidhja Demokratike e Kosovës. Në fakt nuk po flasim vetëm për çmimin e naftës. Qoftë se e lexojmë me kujdes temën e kësaj seance, këtu flasim për çmimin e naftës, flasim për reagimin e qeverisë ndaj një krize dhe mbi të gjitha për barrën e madhe që qytetarëve të Kosovës i ka ra nga një krizë dhe nga një ngritje bukur serioze, jo vetëm të çmimeve të naftës e të energjisë, mirëpo të të gjitha produkteve bazë që i japin kuptim jetës së secilës familje në Republikën e Kosovës.Pra sot nuk po flasim vetëm për rritjen e çmimit të naftës. Sot, ndërsa ne po përballemi me një sfidë globale, realisht në këtë kuvend po e rikthejmë një problem serioz të brendshëm, që lidhet drejtpërdrejt me kulturën e një papërgjegjësie serioze të kësaj qeverie. Pse? Për vite me radhë kemi parë se sa herë që ky vend përballet me kriza, kjo qeveri në vend se të ofrojë zgjidhje, të ulet, të diskutojmë brenda mundësitë reale, kërkon mundësi diqysh me kriju njëfarë përfitimi, me u viktimizu brenda kabinetit të vet“, u shpreh Tahiri.
Ai prezantoi edhe masat që ka propozuar Aleanca për Ardhmërinë e Kosovës për lehtësimin e situatës: uljen ose heqjen e akcizës për naftën dhe reduktimin e TVSH-së, duke argumentuar se këto masa nuk do të dëmtonin buxhetin e Kosovës për shkak të rritjes së çmimeve.
Tahiri theksoi se për një litër naftë, TVSH-ja aktualisht arrin 18%, dhe qeveria po mbledh rreth 65 cent për litër nga qytetarët.
“Për një litër naftë, Qeveria e Kosovës i merr 18 për qind. Në planifikimin buxhetor të këtij viti, për shkak të rritjes së çmimit, edhe nëse do të ishte zvogëluar për 50 për qind TVSH-ja për naftë, prapë të hyrat do të ishin qysh janë të planifikuar, për shkak se është rritur çmimi. Asnjë efekt nuk do të kishte në buxhetin e Kosovës, zvogëlimi i TVSH-së për shkak se është rritur çmimi i naftës, dhe ai çmim po e bën që shteti po i merr diku rreth 65 cent për litër. Dhe këtë barrë nuk po e merr Qeveria, nuk po do ta marrë Qeveria, por po ia lë qytetarëve të Kosovës”, tha ai.
