Shefi i Grupit Parlamentar të Aleancës për Ardhmërinë e Kosovës, Besnik Tahiri, e ka quajtur në esencë skandaloze e në përmbajtje mashtrim dhe dështim rritjen e paralajmëruar të pagave nga qeveria aktuale e Kosovës.
Tahiri ka thënë se rritja e pagave siç është paralajmëruar nga Qeveria është e kundërligjshme pasi Kosova dhe Qeveria i rregullon pagat në sektorin publik me Ligj dhe shumën e rregullon me Ligjin mbi Buxhetin.
“GP i AAK-së ka thirrur këtë konferencë për shkak të se konferenca e kryeministrit ka qenë komunikimi më i rëndësishëm për 80 mijë shërbyes civilë. Gjithë ne kemi pritur që të duartrokasim për rritjen e vlerës së koeficientit. Në esencë është skandaloze, në përmbajtje është mashtrim dhe dështim. Kosova dhe Qeveria i rregullon pagat në sektorin publik me Ligj dhe shumën e rregullon me Ligjin mbi Buxhetin. Rritja e njësive në formë hierarkike të koeficientit mundet me ndodh vetëm nëse ky Ligj i shtrohet një procesi të amendamentimit në Qeveri e më pastaj në Kuvend. Është manipulim me shërbyes civil dhe kanë pritur që së paku vlera e koeficientit të jetë së paku 130 euro. Ajo që ka ndodhur është për momentin e kundërligjshme dhe për të hyrë në fuqi do të duhet të hyjë në një procedurë ligji i pagave..”, u shpreh ai.
Ai në emër të AAK-së ka kërkuar që të mos tentohet blerja e votës por të shkohet përmes Ligjit për Buxhetin.
“Ne kërkojmë që të mos ketë lojë, të mos tentohet blerja e votës por të shkohet përmes Ligjit për Buxhetin. Ajo që u tha për rritje të ekonomisë, të na tregojë dikush se në cilën sektorë është rritur ekonomia. Andaj ne nuk e mbështesim rritjen prej 50 euro, për shkak se ky është mashtrim dhe tentim për blerje të votës”, ka shtuar Tahiri.
Kryeministri i Kosovës, Albin Kurti, të martën ka paralajmëruar se nga janari i vitit 2025 do të ketë rritje prej 55 euro të pagës për të gjithë punëtorët e sektorit publik.
Ai në një konferencë për media ku ka folur për buxhetin e vitit të ardhshëm ka thënë se punëtorëve të sektorit publik nga korriku do të ketë ngritje page prej 110 euro.
Kurti: Nga janari rritje page prej 55 euro, ndërsa nga korriku 110
