Shefi i Grupit Parlamentar të PDK-së, Abelard Tahiri, tha se Kuvendi i Kosovës sa më parë duhet të shpërndahet.
Ndër të tjerash, Tahiri deklaroi se Raporti i Departamentit Amerikan të Shtetit, tregon për regresin që ka shënuar Kosova, me ç’rast, ai kërkoi që të trajtohen të gjitha të gjeturat e këtij raporti, përfshirë edhe ato të “Freedom House”.
“Javën që kaloi DASh publikoi raportin për Kosovën, ku në atë raport përfshihet që të drejtat e njeriut jo që nuk kanë shënuar progres, por në fakt ka edhe regres. Në këtë rast specifikohet në mënyrë të veçantë dhuna ndaj gruas në një ambient jashtëzakonisht jo miqësor, dhuna ndaj gruas me bazë gjinore, dhuna ndaj gazetarëve, dhuna ndaj komuniteteve të margjinalizuara të komuniteteve jo shumicë në vendin tonë. Dhe ajo që është më shqetësuesja është niveli i korrupsionit në vendin tonë. Pra, hera e parë specifikohet si nivel jashtëzakonisht i lartë i korrupsionit dhe korrupsion jashtëzakonisht serioz në institucionet qendrore, në Qeverinë e Kosovës”, deklaroi ai.
Gjatë seancës plenare në Kuvend, Tahiti tutje tha se raporti thekson edhe numrin e madh të ministrave që janë nën hetime.
“Tashmë e specifikon edhe faktin që 1/3 e ministrave të kësaj qeverie janë nën hetime pikërisht për afera korruptive. Pra 1/3 apo pesë ministra të kësaj qeverie dhe një zëvendëskryeministre dhe një zëvendësministre të dënuar nga kapitulli i veprave për korrupsion. E gjithë kjo situatë në vendin tonë që është krijuar si rezultat i kësaj qeverisje jashtëzakonisht të dobët dhe jo efektive dhe me nivel të lartë të korrupsionit, e dëshmon edhe një herë atë që kemi kërkuar në vazhdimësi si Grup Parlamentar i PDK-së. Ky kuvend duhet të mblidhet sa më parë edhe të diskutojë për datën e zgjedhjeve. Sepse, ky kuvend është shndërruar në barrierë për t’i mbrojtur të korruptuarit në vendin tonë”, tha ai.
Tutje, ai vlerësoi që asnjëherë s’ka pasur rezistencë më të madhe në parlament për themelimin e komisioneve hetimore për afera korruptive./teve1.info/.
