Madje, ai u bëri thirrje që mos të mungojë as sovraniteti në atë pjesë të vendit, teksa shpresoi se nuk do kthehet gjendja e njëjtë si në korrik të vitit 2011.
“E nderuara Qeveri e Republikës së Kosovës, si opozitë ju mbështesim edhe sot e kësaj dite që të vazhdoni me funksionimin e punës së institucioneve që sapo i përmenda për atë pjesë të territorit të vendit. Jeni përgjegjës për moslejimin e kthimit të gjendjes para korrikut të vitit 2011. Jeni përgjegjës për ushtrimin e sovranitetit të Kosovës edhe në atë pjesë të veriut. Prandaj ne do ju mbështesim deri në atë moment ku ju nuk do hiqni dorë nga Veriu”, deklaroi Tahiri para deputetëve.
Më tej, Tahiri tregoi disa nga angazhimet e tyre që kanë bërë deri më sot në pjesën veriore të vendit, duke përmendur faktin se për më shumë se një dekadë kanë pasur synim rendin dhe ligjin në atë pjesë.
“Kemi punuar për më shumë se një dekadë për vendosjen e sundimit, rendit dhe ligjit në veri të Kosovës. Për më shumë se një dekadë kemi pasur angazhim të përbashkët për vendosjen e policisë së Kosovës për të ofruar një ambient më të qetë e më të sigurt për të gjithë qytetarët që jetojnë në atë pjesë. Për më shumë se një dekadë kemi punuar së bashku që ta vendosim prokurorin e shtetit i cili do të ndjekë kriminelët, strukturat paralele, qofshin ata shqiptarë, qofshin ata serbë. Kemi punuar më shumë se një dekadë për vendosjen e gjyqësorit në atë pjesë të vendit”, shtoi ai tutje.
Gjithashtu, ai tha se ky ka qenë një angazhim i përbashkët për largimin e strukturave paralele, të cilat sipas tij, financoheshin nga Beogradi.
“Kemi pamundësuar funksionimin e kriminelëve që mbështeteshin nga politikat serbe, siç ishte edhe Radojçiçi”, theksoi Tahiri./Teve1.info/.