Kandidati i Lidhjes Demokratike për deputet, Xhafer Tahiri, thotë se për “fatin e keq të Kosovës”, çdo qeveri që vjen në pushtet do të detyrohet që ta zbatojë Marrëveshjen e Ohrit.
Sipas tij, nga veprimet e kryeministrit aktual, Albin Kurti edhe ai vetë do të jetë i detyruar që ta pranojë kushtin e BE-së në mënyrë që Kosova të integrohet drejt saj.
“Republika e Kosovës duhet të respektojë të gjitha zotimet që i ka marrë në aspektet se kjo na bën shtet serioz. Duam apo s’duam, dëshiron apo nuk dëshiron ky kryeministër, për fat të keq tani për Kosovën është bërë kusht në procesin e integrimit evropian zbatimi i Marrëveshjes së Ohrit. Për fat të keq të Kosovës, kjo është bërë kusht nga Bashkimi Evropiani drejt rrugës sonë për në Bashkimin Evropian. Tani për tani, është kusht zbatimi i Marrëveshjes së Ohrit”, tha ai në emisionin “Këndi i Debatit” në tëvë1.
Ndërsa, Xhaferi potencon se LDK-ja ka aftësi politike që të diskutojë e t’i bindë partnerët strategjikë që disa pika të Marrëveshjes janë të dëmshme për Kosovën.
“Natyrisht që një diplomaci e mençur e urtë diskuton me aleatët dhe i bindë që në momentet e caktuara të kësaj marrëveshje janë të dëmshme”, deklaron ai.
Ndërkohë, shton se në kuadër të Marrëveshjes Qeveria Kurti është pajtuar që Serbia të ketë edhe qasje neutrale ndaj statusit të Kosovës.
“Përveç pikës së shtatë, problematike është fakti se Qeveria Kurti është pajtuar që Serbia të ketë qasje neutrale ndaj statusit të Kosovës. Në krye të herezi, strategjia e Kosovës ka qenë që çdo marrëveshje do të zbatohet me njohjen de-facto e de-juro nga Serbia të shtetësisë së Kosovës. Kjo Qeveri ka pranuar për fat të keq që të kemi pa projedikim për statusin final…”, tha Tahiri.
Ai për fund tha se “çdo qeveri do të detyrohet që ta zbatojë Marrëveshjen e Ohrit, e sekuencimin e saj, nëse duam të ecim në rrugën e integrimit të BE-së”./teve1.info/
