Shefi i grupit parlamentar të AAK-së, Besnik Tahiri pas mbledhjes së Kryesisë së Kuvendit ka se thënë se qëndrimi i partisë së tij lidhur me dinarin është që ai nuk duhet assesi të bëhet temë e dialogut në Bruksel.
Sipas Tahirit, kjo temë duhet të ketë vetëm diskutim të brendshëm, me partnerët ndërkombëtarë dhe në këtë formë të arrihet një zgjidhje.
“Sa i përket çështjes së dinarit, qëndrimi ynë është i saktë: Euro është valuta e vetme në Kosovë dhe ajo duhet të jetë. Për këtë temë duhet të ketë diskutim të brendshëm në Kosovë me partnerët tanë ndërkombëtarë dhe me argumentimet që i ka qeveria në mënyrë që të arrihet deri tek një zgjidhje dhe assesi kjo temë nuk duhet që të bëhet temë e dialogut në Bruksel”, ka shkruar ai në Facebook.
Më tej, ai ka thënë se është fatkeqësi që vendimi i BQK-së për dinarin po bëhet temë ndërkombëtare.
“Është fatkeqësi e madhe, që ky vendim i brendshëm i Bankës Qendrore të Kosovë të bëhet temë ndërkombëtare! Të gjithë hapat e qeverisë kanë qenë dhe janë të gabuar – është dashur që të ketë një njoftim paraprak, të jepet një afat kohor dhe të merret një vendim i pakthyeshëm dhe jo kjo çështje të bëhet problem ndërkombëtar”, ka shtuar ai.
