Besnik Tahiri, deputet nga Aleanca për Ardhmërinë e Kosovës, thotë se pushteti po synon t’i sjellë njerëzit e vet në krye të Bordit të Organit Shqyrtues të Prokurimit Publik (OSHP) dhe se moszgjedhja e këtij bordi është një nga dështimet me të mëdha të pushtetit.
“Një nga dështimet kyçe të kësaj shumice parlamentare është Organi Shqyrtues i Prokurimit, që në fakt është gjykata e secilit kontraktim për investime kapitale, investime buxhetore, a janë ato komuna apo Ministri, pra është gjykata e tenderëve publikë”, ka thënë ai për emisionin “De Jure”, i cili po transmetohet në “Tëvë1” dhe “Betimi për Drejtësi”.
Ai shtoi se nuk i di arsyet, mirëpo në seancë është dhënë një arsyetim cili realisht nuk ka qëndruar, dhe se janë dy pista të cilat sipas tij mund të ndiqen.
“E para, do të thotë në Organin Shqyrtues të Prokurimit, shumica parlamentare dëshiron t’i ketë njerëzit e vet dhe e dyta d.m.th të operojë me tenderë burimorë, ashtu siç po ndodh kohën e fundit, për shkak se ky organ, siç e dini, në momentin kur ka një ankimim, është ky organ i cili e jep të drejtën finale, vendimin për fituesin e një kontrate publike”, është shprehur ai.
Për më shumë ndiqeni hulumtimin “Lufta politike” për gjykatën e tenderëve, i cili po transmetohet në “Tëvë1” dhe “Betimi për Drejtësi”./Tëvë1/
