Aleanca për Ardhmërinë e Kosovës ka përgatitur një rezolutë për tre vjetorin e qeverisjes së kryeministrit, Albin Kurti, duke kërkuar që kjo qeverisje të përmbyll mandatin e saj me dorëheqje dhe e dyta të vet shpërbëhet Kuvendi i Republikës së Kosovës.
Deputeti i kësaj partie, Besnik Tahiri tha se kjo qeveri i ka bërë vetëm dëm vendit dhe e ka kthyer Kosovën në një gjendje që nuk ka qenë asnjëherë më parë.
Po ashtu, Tahiri ka thënë se Kurti është dorëzuar dhe se po kërkon zgjedhje të parakohshme.
“Ne kemi përgatitur një kërkesë për një debat parlamentar në trevjetorin e kësaj keqqeverisje, e cila realisht ka arritur t’i bëjë vetëm dëme Kosovës dhe ta kthejë në pikën më të errët. Mirëpo unë jam i kënaqur që dje kryeministri Kurti e tha edhe vetë se e ka kuptuar se ai duhet të japë dorëheqje. Kur në fillim të këtij mandati, kryetari Haradinaj thoshte se ky është një mashtrues, njerëzit shikonin me habi të madhe. Ajo çka karakterizohet këto tri vite është me të vërtetë një qeverisje që nuk i qëndron asnjë vendimi mbrapa. Kryeministri u dorëzua në mandatin e tij të tretë dhe është duke kërkuar që vendi të shkojë në zgjedhje”, ka deklaruar Tahiri.
Teksa ka përmendur sanksionet e BE-së ndaj Kosovës, Tahiri ka thënë se do të vendosin një rezolutë në Kuvend për të votuar shkarkimin e kësaj qeverie./teve1.info/.
