Aleanca për Ardhmërinë e Kosovës, sot ka thirrur seancë të jashtëzakonshme për “nevojën e ngritjes së koeficientit të pagave”.
Më ç’rast, Shefi i Grupit Parlamentar i kësaj partie, Besnik Tahiri, tha se është për “keqardhje”, vendimi i Lëvizjes Vetëvendosje, për të mos marrë pjesë në këtë seancë.
“Kemi kërkuar të debatojmë rreth ngritjes së koeficientit në ligjin për buxhet, në mënyrë që të ketë një rritje të pagave në sektorin publik. Me të vërtetë është për keqardhje, po ashtu tregon për një logjikë tepër të mbrapshtë të Vetëvendosjes, për shkak se jemi dakorduar për këtë temë”, deklaroi Tahiri gjatë debatit parlamentar në Kuvend.
Megjithatë, Tahiri vazhdoi me trajtimin e kësaj pike, teksa shtoi që Kosova tani ka momentin e fundit për t’iu shmangur një kolapsi ekonomik.
“Debati parlamentar në lidhje me nevojën për ngritje të koeficientit të pagave, bazohet te gjendja e përgjithshme sociale dhe ekonomike në vend, e që e cila është shumë e vështirë. Ligji i Pagave u miratua pa ndonjë referencë dhe vlerësim të punës dhe se si do të ndikojë i njëjti në ekonomitë familjare të punësuarve në sektorin publik. Duke e ditur që jemi në një situatë ekonomike të rëndë dhe duke i parë trendet në vitin 2023, është momenti i fundit që të shmanget një kolaps ekonomik, pasojat e të cilit do t’i shohim në trendet e vitit 2024. Është tepër me rëndësi që ky Kuvend ta votojë një rezolutë e cila do të kërkojë nga Qeveria që të rritë koeficientin nga 105 në 129”, theksoi më tej Tahiri.
Kjo seancë është thirrur nga opozita, me 43 nënshkrime.
Koeficienti i pagave përcaktohet në Ligjin për buxhetin dhe ai mund të ndryshojë varësisht nga rritja ekonomike./teve1.info/.
