Shefi i grupit parlamentar të Aleancës për Ardhmërinë e Kosovës, Besnik Tahiri, ka thënë se ata janë kundër qarkullimit të dinarit në Kosovë, por se problemi qëndron te menaxhimi i situatës, e cila ka sjellë si pasojë dobësimin e Kosovës në marrëdhënie bilaterale.
“Marrëdhëniet e Kosovës me Bashkimin Evropian dhe SHBA-në kurrë s’kanë qenë më keq. Kosova është nën sanksione, përderisa SHBA e trajton jo si partnere por si palë të marrëveshjes. Valuta në Kosovë është euro, dinari s’ka vend të qarkullojë në asnjë sistem të pagesave dhe të qarkullimit. Krejt menaxhimi i kësaj çështje ka sjellë një problem që po e dobëson Kosovën në marrëdhënie bilaterale dhe që Kurti do të lëshojë pe për qëndrimet e veta”, ka thënë Tahiri, raporton RTK.
Sipas tij, BE duhet të ketë një ofertë të qartë ndaj Kosovës, për sigurinë dhe anëtarësimin në NATO e Këshill të Evropës.
“Jemi duke punuar që të enjten e ardhshme si pikë të parë të rendit të ditës të kemi seancën e jashtëzakonshme që do ta ftojmë me 40 nënshkrime, për trajtimin e ligjit për sigurime shëndetësore”, ka shtuar ai.
