Shefi i deputetëve të PDK-së, Abelard Tahiri vlerëson se me projektligjin e ri për mbrojtjen e informacionit të klasifikuar, lëshimin e lejes së sigurisë për qasje në informacione dhe dokumente të klasifikuara nuk do ta bëjë AKI-ja, por një zyre që po e themelon Albin Kurti.
Tahiri ka shkruar se kjo përgjegjësi e AKI-së po tentohet të grabitet nga pushteti i Kurtit
“Kjo përgjegjësi dhe kompetencë që i takon AKI-së si Autoritet Verifikues, sot po përpiqet të grabitet nga pushteti i Albin Kurtit, i cili me projektligjin e ri për mbrojtjen e informacionit të klasifikuar, dëshiron ta themelojë një institucion brenda Zyrës së Kryeministrit që do të jetë përgjegjës për vlerësimin dhe pajisjen me leje të sigurisë”, ka shkruar Tahiri.
Tahiri ka thënë se themelimi i kësaj zyre do të ishte “përpjekja më flagrante për të shembur traditën institucionale në kurriz të sigurisë sonë kombëtare e shtetërore”.
“Kjo mësymje për të vënë duart në një mekanizëm jashtëzakonisht të rëndësishëm për sigurinë, ngjason me pushtetet autoritare ku pushtetarët e jo ligji, vendosin se kush është i denjë për të pasur qasje në informacione të klasifikuara, duke shënuar kështu preludin e një mentaliteti frikësues e shantazhues që Albin Kurti po përpiqet ta instalojë në Kosovë”, ka shkruar ai.
