Deputeti i Aleancës për Ardhmërinë e Kosovës, Besnik Tahiri, e paraqiti propozim-rezolutën për punën dyvjeçare të Qeverisë së Kosovës, raporton teve1.info
Gjatë fjalës së tij, Tahiri tha se sektori publik në Kosovë nuk ka qenë asnjëherë në krizë më të madhe.
“Sot Qeveria udhëhiqet me ushtrues detyre në nivelet më të larta të shtetit. A e dini pse, sepse me një e-mail vendosen dhe me një e-mail shkarkohen. Sot Ligji i pagave ka ndihmuar 10 mijë njerëz, 70 mijë nuk e dinë saktësisht sa e kanë pagën e tyre”, ka theksuar Tahiri.
Sipas Tahirit, Kosova kurrë nuk ka qenë më e dobët në rrafshin ndërkombëtar.
“Raporti i Departamentit Amerikan të Shtetit ka vërtetuar se kjo Qeveri tani ka hyrë edhe në afera korruptive. Rasti i Martin Berishajt është marrja e kësaj Qeverie dhe askush asnjë fjalë s’e flet. Politika e jashtme nuk e ka mbrojtur në asnjë formë interesin e vendit”, ka theksuar Tahiri.
Ai ka kritikuar Qeverinë edhe për mungesë të investimeve kapitale. Ka përmendur disa rrugë magjistrale të cilat sipas tij janë lënë në gjendje të mjerueshme.
“Çka kanë bërë është që e kanë lidhur fshatin e Arben Gashit dhe Bekë Berishës me një urë”, është shprehur Tahiri.
Ai ka thënë se rezoluta e tyre parasheh disa pika dhe është alarm për kryeministrin dhe kabinetin e tij, anëtarët e të cilit sipas tij, nuk e kanë bërë asnjë veprim.
