Koalicioni AAK-NISMA-Konservatorët- Forumi Intelektual E30-ideal, nisën ditën e nëntë të fushatës zgjedhore.
Por, këtë e bën pa kandidatin e tyre për kryeministër.
Kjo pasi, Ramush Haradinaj, ndodhet në Uashington, për inaugurimin e presidentit, Donald Trump.
E kandidati për deputet nga ky qytet, Besnik Tahiri, nuk la pa përmendur magjistralen Prishtinë – Podujevë.
“Kjo qeveri dështoi të ndërtoi një autostradë Podujevë-Prishtinë. Na kanë maltretuar çdo ditë për 4 vite rresht, e kanë lënë zonë më të pasur, me njerëz më të dëshmuar si në luftë për liri, si paralufte, si në ekonomi, zorrë qorre. Vinë këtu vetëm kur kanë nevojë për vota, betohen në libra të shenjët, pinë qaj te Bari Hoti dhe shkojnë në Prishtinë. Këtyre duhet t’i themi stop”, tha ai.
Ndërkohë, për ata që votuan ndryshe në zgjedhjet e kaluara, kandidati për deputet nga AAK, pati një pyetje.
“A po iu duket se është mirë Kosova në binarët që e ka vendosur qeveria aktuale. Atëherë hajde punojmë ta qesim Kosovën në atë ëndrrën që kemi pasur”, tha Ardian Gjini.
E nga llapi, ky koalicion vazhdoi për në Drenicë.
Këtu koalicioni për Kosovën Fituese, tha se u bashkuan për të fituar Kosova.
“Ne, si koalicion, jemi bashkuar për ta ndaluar përçarjen dhe për të siguruar një të ardhme të qëndrueshme dhe të zhvilluar për të gjithë. veçVEPRA është ajo që do të na ndihmojë të ecim përpara, jo fjalët që ndajnë. Prandaj, bashkë për Kosovën fituese, veç vepra”, tha Limaj
Tubim me qytetarët, të dielën në mbrëmje mbajti edhe në Obiliq.
