Shefi i deputetëve të PDK-së, Abelard Tahiri është deklaruar pasi dështoi dy herë radhazi sot mbajtja e seancës së Kuvendit.
Tahiri ka thënë se ka pika të papërfunduara që nga 2022 dhe sipas tij “kjo mënyrë e papërgjegjshme e drejtimit të Kuvendit duhet të ketë një fund diku”.
“Tashmë vendi drejtohet nga një mazhorancë shumë e papërgjegjshme, nga një mazhorancë e cila nuk arrin me i pasë 61 deputetë në Kuvend. Një mazhorancë që ka lanë më shumë se 50 pika të pavotuara, pra që nga viti i kaluar. Ne kemi ende pika të papërfunduara të agjendës së vitit 2022. Pra kjo mënyrë e papërgjegjshme e drejtimit të Kuvendit nga kjo mazhorancë, normalisht që duhet të ketë një fund diku. Nuk mund të vazhdojë kështu dhe nuk mund të mbesin në pafundësi projektligje të rëndësishme për vendin të pavotuara”, ka thënë Tahiri para gazetarëve.
Tutje situatën e ka quajtur kaos parlamentar.
“Kjo është edhe reflektim se si është duke u Qeverisë vendi sot nga kryeministri Kurti dhe nga kjo Qeveri. Absolutisht jemi në një kaos parlamentar”, ka deklaruar Tahiri.
