Deputeti i AAK-së, Besnik Tahiri, e ka quajtur mashtrim rritjen e pagave për vitin e ardhshëm në sektorin publik në Kosovë, duke e rritur koeficientin e pagave për 5 euro, raporton teve1.info
Tahiri ka thënë se me rritjen prej 5 eurove të koeficientit të pagës, shumicës së kategorive në sektorin publik i bie që t’i rritet paga nga 30 deri në 80 euro.
Andaj, Tahiri këtë e ka quajtur mashtrim.
“Qeveria vazhdon të tallet me nëpunësit publik. Me buxhetin e ri, i bie të kemi një ngritje të koeficientit për pesë euro. Në total, një shumice dërrmuese të kategorive buxhetore i bie të kenë 30 deri në 80 euro më shumë të hyra mujore. Duke ditë inflacionin kjo nuk është rritje reale nominale. Thënë ndryshe qeveria nominalisht rritë pagat, por realisht mashtron!”, ka shkruar Tahiri në Facebook.
Qeveria të martën mori vendim që bazuar në rritjen e buxhetit për vitin 2023, të rritet edhe shuma e koeficientit të pagës nga 105 në 110 euro.
