Kryetari i GP të AAK-së, Besnik Tahiri, ka thënë se edhe pse partia e tij e mbështet Qeverinë lidhur me propozimin për normalizimin e marrëdhënieve Kosovë-Serbi, ajo duhet të ketë kujdes për dy nene të këtij propozimi.
Ai ka shtuar se dokumenti ka dykuptimësi dhe sipas tij interpretimi i dyfishtë e ka peshën pasi të nënshkruhet marrëveshja.
Tahiri ka deklaruar se dyshon se Kurti do të tërhiqet nga nënshkrimi.
“Ajo që duhet të kërkohet nga ne si deputetë sot është të ketë kujdes në dykuptimësinë që ekzistojnë në disa nene. U fol për nenin 7 dhe për marrëveshjet. Interpretimi i dyfishtë e ka peshën pas nënshkrimit të marrëveshjes. Qeveria duhet ta ketë kujdesin e veçantë në trajtimin e nenit 7 dhe nenit 10. Kryeministër dialogun e ke udhëheqë vetë. Kuvendin e ke thirr vetëm atëherë kur ke pas nevojë për mbështetje formale a politike që lidhet me referendumin dhe zgjedhjet në Serbi. Kuvendi ka qenë i anashkaluar. Sot duhet të kesh kujdes se si po e trajton këtë temë. Prej AAK-së sa i përket kësaj marrëveshjeje e ki mbështetjen, por unë dyshoj qe në fund të fundit ke me u tërheqë. Siç je tërheqë në krejt çështjet tjera. Zajednicës ti vetë ia ke dhënë këtë emër”, ka thënë ai.
Tahiri ka thënë se dialogut duhet t’i jepet epilog, teksa ka shtuar se tani dokumenti i normalizimit është i rëndësishëm për pozitën e Kosovës në shumë fusha.
“Ne kemi vlerësuar se ky dokument në këto rrethana është me interes për vendin. Për forcimin e stabilitetit dhe rrugën e Kosovës drejt anëtarësimit në NATO. Padyshim se i ka te metat e veta. Por kemi vlerësuar se shënon kapitullin e rëndësishëm për njohjen. Ky është moment shumë i rëndësishëm për të ardhmen e vendit tonë. Kërkohet unitet politik karshi agjendës armiqësore të Serbisë. Qëndrimi ynë nuk ka të bëjë me mbështetjen e Albin Kurtit as të qeverisë se tij sepse të gjithë e dimë cila o gjendja e vendit nga qeverisja e tij”.