Shefi i Grupit Parlamentar të Partisë Demokratike të Kosovës, Abelard Tahiri, ka deklaruar se deputetët e shumicës kanë vendosur që ta bllokojnë hetimin e aferës së keqpërdorimit të parave për blerjen e teksteve shkollore.
Sipas tij, ata e kanë zëvendësuar kryetarin dhe zëvendës kryetarin e këtij komisioni hetimor nga radhët e opozitës, të cilët janë zgjedhur nga Kuvendi.
“Në panikun e gjetjeve të deritanishme në Komisionit Hetimor Parlamentar për hetimin e aferës së keqpërdorimit të miliona eurove në emër të subvencionimit të blerjes së teksteve shkollore, deputetët e shumicës, anëtarë të këtij komisioni kanë vendosur që t’a minojnë dhe bllokojnë hetimin përfundimtar të kësaj afere, duke u mbledhur sot në mënyrë të paligjshme, e duke e zëvendësuar kryetarin dhe zëvendës-kryetarin e këtij komisioni nga radhët e opozitës – e të cilët – i ka zgjedhur Kuvendi”, thuhet në reagimin e tij në Facebook.
Tutje, Tahiri është shprehur se si grup parlamentar iniciues të këtij Komisioni Hetimor këtë vendim të shumicës e konsiderojnë atak të drejtpërdrejtë mbi mandatin e deputetit si përfaqësues i popullit.
“Si grup parlamentar iniciues të këtij Komisioni Hetimor, vendimin e sotëm të deputetëve të shumicës parlamentare e konsiderojmë jo vetëm të paligjshëm, por atak të drejtpërdrejtë mbi mandatin e deputetit si përfaqësues i popullit, vendim i cili, në të njëjtën kohë është edhe një provë shtesë se pse pushteti i frikësohet hetimit të kësaj afere dhe pse ka vendosur që në mes të procesit t’a bllokojnë këtë komision”, ka shtuar ai.
Gjithashtu ka njoftuar, se para se t’i drejtohen Prokurorisë Speciale, për këtë vendim të paligjshëm do të kërkojnë sqarime nga Kryetari i Kuvendit.
“Për këtë vendim të paligjshëm e të turpshëm, do të kërkojmë sqarime edhe nga Kryetari i Kuvendit, para se ti drejtohemi Prokurorisë Speciale për të hetuar këtë aferë korruptive, që ka për kryeprotagoniste Ministren e Arsimit Arbërie Nagavci”, ka shkruar ai./teve1.info.
