Partia Demokratike e Kosovës ka paralajmëruar dërgimin në Gjykatën Kushtetuese të 20 ligjeve të miratuara nga Kuvendi i Kosovës në seancën e 5 dhjetorit.
Këtë e ka bërë të ditur Abelard Tahiri, shef i Grupit Paralamnetar të PDK-së.
Ai ka thënë se sjellja e shumicës parlamentare që “improvizoi disa seanca brenda ditës është e patolerueshme.
“Duke e vlerësuar të patolerueshme një sjellje të tillë të shumicës parlamentare e cila brenda ditës improvizoi disa seanca në të cilat u dhunua instituti i shqyrtimit parlamentar të ligjeve (siç e përcakton Kushtetuta), kemi vendosur që njëzetë ligjet e miratuara në seancat e datës 05 dhjetor 2024 t’i kontestojmë në Gjykatën Kushtetuese të Republikës së Kosovës”, ka shkruar Tahiri.
Sipas tij, procedurat e shqyrtimit dhe miratimit të këtyre ligjeve janë në kundërshtim me Kushtetutën.
“Ne jemi të bindur që procedura e shqyrtimit dhe miratimit të këtyre ligjeve është kundër-kushtetuese dhe jemi duke punuar që të gjitha parashtrimet tona para Gjykatës Kushtetuese, si gjithnjë, të konfirmohen të bazuara, të drejta dhe mbi të gjitha profesionale. Si deputetë, asnjëherë nuk do të qëndrojmë indiferentë përballë shkeljes dhe cenimit të rendit tonë kushtetues!”, ka shkruar Tahiri.
Ndaj këtij paralajmërimi ka reaguar deputeti i LVV-së, Adnan Rrustemi
“PDK paska thanë se do t’i dërgojnë 20 ligje në Gjykatën Kushtetuese. Hallin e kanë te konfiskimi i pasurisë e po e mbulojnë Ligjin për Byronë me ligje tjera.Mos u lodhni me 20, koncentrohuni aty ku po ju dhem, te Byroja, të cilën po doni me vonu. Veç vonim, por s’ka shpëtim”, ka shkruar Rrustemi.
