Ambasadori i BE-së në Kosovë, Tomas Szunyog, tha se mosbashkëpunimi ndërmjet partive në Kosovë, vazhdon ta sfidojë punën e Kuvendit.
Pas dorëzimit të raportit për Kosovën për vitin 2023 nga Komisioni Evropian, Szunyog tha se anëtarësimi i vendit në Bashkimit Evropian, është çështje strategjike.
“Anëtarësimi në Bashkimin Evropian është çështje strategjike dhe këtu përshtatja e vlerave të Kosovës me politikat e sigurisë së jashtme vlerësohet lartë. Ne veçanti agjenda e reformës së drejtë të BE-së është shumë me rëndësi, po ashtu stabiliteti politik i Kosovës ka lejuar që të miratohet një pjesë e mirë e legjislacionit, siç është reforma elektorale. Sidoqoftë, mos bashkëpunimi ndërmjet partive dhe mos pajtimet ndërmjet mazhorancës, vazhdon ta sfidojë punën e Kuvendit”, potencoi Szunyog në një konferencë të përbashkët me zëvendëskryeministrin, Besnik Bislimi.
Ai ka thënë se meqenëse Kosova mbetet në fazë të hershme të zhvillimit të sistemit gjyqësor duhet edhe më tutje t’i fuqizojë veglat duke mbrojtur integritetin, llogaridhënien pavarësinë dhe efikasitetin e sistemit gjyqësor.
